उपराष्ट्रपति झा चीनपाखे
उपराष्ट्पति परमानन्द झा युनानया राजधानी कुनमिंगय् जुइत्यंगु "न्हापांगु चीन दक्षिण ब्यापार मेला"य् ब्वति कायेत मंगलवाः उखेपाखे झायादीगु दु । उपराष्ट्पति झायात मन्त्रीपरिषदया नायः खिलराज रेग्मीं विदाई यानादिल । बिदाइ यायेगु झ्वलय् परराष्ट्र मन्त्री व सूचना नापं संचारमन्त्री नं विमानस्थलय् उपस्थित जुयादीगु खः । जेठ २३ गतेनिसें २६ गतेतक कुनमिंग "अन्तराष्ट्रिय सम्मेलन केन्द्र"य् जुइत्यंगु ब्यापार मेलाया उलेज्या ज्याझ्वलय् उपराष्ट्पति झापाखें नं सम्बोधन यानादीगु ज्याझ्वः दु ।
मंकाः सन्देश, व्यावहारिक ग्वाहालि, सकसिगु नितिं सकारात्मक लिच्वः नापं मैत्रीपूर्ण विकास विषयस जुइगु उगु भेलाय् दक्षिण एसिया, दक्षिण पूर्वी एसिया व अफ्रिकी देशया विशिष्ट मनूतसें ब्वति काइगु जूगु दु ।
चीन सरकारं उपराष्ट्पति झाया भ्रमणयात राजकीय भ्रमणया सम्मान बीगु उगु झ्वलय् उपराष्ट्पति झां चिनियाँ समकक्षी ली उनचाओ लिसेंया ब्यक्तिलिसे नापलाइगु ज्याझ्व: दु ।
भ्रमण पुचलय् जहान, सरकारी अधिकारी, ब्यापारी लिसें ८५ म्ह सहभागी दुगु वाणिज्य मन्त्रालयं न्ह्यथंगु दु । वय्कः थ्वहे वइगु जेठ २६ गते चान्हय् स्वदेश लिहांझाइ ।
