निर्वाचन अध्यादेश जारी यायेगु लकस ब्वलंकेत राष्ट्रपतिपाखें इनाप
राष्ट्रपति डा. रामवरण यादव व नेकपा एमालेया नायः नापं उच्चस्तरिय राजनीतिक समितिया नायः झलनाथ खनाल दथुइ मंगलवाः नापलानाः सहलह ब्याकूगु दु ।
शीतल निवासय् जूगु उगु नापलायेगु झ्वलय् देशया लिपांगु राजनीतिक अवस्था, चुनावया तयारी, निर्वाचन ऐन, असन्तुष्ट दललिसे जुयाच्वंगु वार्ता लिसें थी थी विषयस सहलह जूगु खः ।
थ्वहे झ्वलय् राष्ट्रपति डा. यादवं गुलिफु उलि याकनं राजनीतिक दल दथुइ सहमति कायम यानाः निर्वाचन अध्यादेश जारी यायेगु लकस ब्वलंकेत नायः खनालयात इनाप यानादिल ।
लिसलय् संयोजक खनालं दलत दथुइ सहमति दयेकेगु नितिं थी थी चरणय् सहलह जुयाच्वंगु धयादिसें याकनं न्हू कथं निकास पिहांवइगु खँय् थः आशावादी जूगु धयादीगु खनालया स्वकीय सचिव रामबाबु अधिकारीं जानकारी बियादीगु दु ।
