देय् संविधानसभाया चुनावपाखे न्ह्याःवनाच्वंगु : खनाल
नेकपा एमालेया नायः झलनाथ खनाललिसे नेपाःया नितिं अमेरिकाया राजदूत पिटर डब्लु बोडीं मंगलवाः नापलानाः खँल्हाबँल्हा यानादीगु दु ।
नेकपा एमालेया केन्द्रीय ज्याकू बल्खुइ जूगु उगु सहलहस राजदूत बोडीं संविधानसभाया चुनाव, नेपाःया वर्तमान राजनीतिक अवस्था लिसेंया विषयस चिउताः प्वंकादीगु खः ।
थ्वहे झ्वलय् नायः खनालं दलत दथुइ वार्ता जुयाच्वंगुलिं छुं दिं दुने सहमति जुइगु विश्वास प्वंकादीगु नायः खनालया ग्वाहालिमि निर्मल भट्टराईं जानकारी बियादीगु दु । अथेहे नायः खनालं छुं छुं राजनीतिक दलया असन्तुष्टियात सम्बोधन यासें देय् निक्वःगु संविधानसभाया चुनावपाखे न्ह्याःवनाच्वंगु अवस्थाय् वइगु मंसीर दुने संविधानसभाया चुनाव यायेत वर्तमान सरकार, निर्वाचन आयोग व मू मू राजनीतिक दल तयार जूगु नं धयादिल ।
नापलायेगु झ्वलय् अमेरिकी राजदूत बोडीं फुक्क दल सहमतिपूर्वक चुनावय् ब्वति काइगु विश्वास प्वंकादिसें वइगु चुनाव स्वच्छ, निष्पक्ष व धाँधलीरहित कथं क्वचायेकेत अमेरिका नेपाःयात ग्वाहालि यायेत तयार जूगु जानकारी बियादीगु दु ।
