कवि केशरी चित्तधर हृदयया बुन्हि हन
झी कवि केशरी चित्तधर हृदयया १०७ दँ बुन्हि मंगलवाः छगू ज्याझ्वःया दथुइ हन । थ्वहे लसताय् नेपालभाषा परिषदं छगू तःजिगु समारोह यासें चित्तधर हृदयया बुन्हिया नापं थी थी सिरपाः लःल्हाःगु दु ।
नेपालभाषा परिषदया नायः फणिन्द्र रत्न बज्राचार्यया सभाध्यक्षताय् जूगु उगु ज्याझ्वलय् मूपाहां प्रा.डा. तेजरत्न कंसाकार ने.सं. ११३२ दँया चित्तधर सिरपाः वरिष्ठ कलाकार भृगुराम श्रेष्ठयात लःल्हानादिल ।
थुकथं हे दँयदसं भाषासेवी न्ह्यलुवापिन्त लःल्हाइगु मानार्थ उपाधि "भाषाथुवाः" थुगुसी प्रा. प्रेमशान्ति तुलाधरयात, अथेहे ठाकुरलाल सिरपाः निबन्धकार भाजु सुरेन्द्रमान श्रेष्ठयात, मोतिलक्ष्मी सिरपाः अन्तराष्ट्रिय भिक्षुणी संघयात व केशवलाल बाखं सिरपाः च्वमि भाजु रामभरोस कापडि भ्रमरयात मूपाहां कंसाकारपाखें लःल्हानादीगु खः ।
ज्याझ्वलय् सिरपाः लःल्हाना कयादीपिं, मूपाहां लिसें परिषदया पुलांम्ह नायः सत्यमोहन जोशीपिन्सं न्ववानादीगु खः ।
कबि चित्तधर हृदयया बुदिंया झ्वलय् येँया कालिमाटी दुगु वय्कःया झ्वाताय् श्रद्धाया स्वां देछायेगु ज्या जूगु खः ।
