जर्मन कपया उपाधि बायर्नयात

जर्मन कप फुटबलया उपाधि बायर्न म्यूनिखं त्याकूगु दु ।

शनिवाः चान्हय् जूगु फाइनल कासाय् स्टुटगार्डयात निगूया विरुद्ध स्वंगू गोलं बुकूसें बायर्नं उगु कपय् कब्जा याःगु खः ।

बर्लिनय् जूगु उगु कासाय् बायर्न म्यूनिखं थोमस मुलरया पेनाल्टी गोलपाखें अग्रता काःगु खः । अथेहे कासाया पीच्यागूगु मिनेटय् व ख्वीछगूगु मिनेटय् मारियो गोमेजं निगू गोल यायेवं बायर्न स्वंगू गोलं न्ह्यःने लाःगु खः ।
तर कासाया न्हय्छगूगु व चय्गूगु मिनेटय् स्टुटगार्डया नितिं मार्टिन हार्निकं लगातार निगू गोल याःसां नं कासा बुइगुपाखें धाःसा बचे यायेमफुत ।

थुगु उपाधिया नापनापं बायर्न म्यूनिखं छगू हे सिजनय् बुण्डसलिगा, यूरोपियन च्याम्पियन्स लिग व जर्मन कप त्याकूगु न्हापांगु जर्मन क्लब जूगु दु । नापं थुगु सिजनपाखें बायर्न म्यूनिखं बिदाई काःम्ह प्रशिक्षक जेप हेइन्केसया लागि नं सुखद जूगु दु ।

वइगु सिजननिसें बार्सिलोनाया पुलांम्ह प्रशिक्षक पेप ग्वार्डिओलों बायर्न म्यूनिख कःघाइगु जूगु दु ।

More Stories Like this