रेग्मीया राजीनामाया खँय् बारया अडान कायम हे
नेपाल बार एशोसियसनं मन्त्री परिषदया नायः खिलराज रेग्मीं प्रधानन्यायधिस पदपाखें राजीनामा बीमाःगु पुलांगु अडान हाकनं लिसाकाःगु दु ।
बाग्लुंग सदरमुकामय् शनिवाः क्वचाःगु निन्हुया केन्द्रीय कार्यकारिणी परिषदया मुँज्यां रेग्मीया राजीनामा कायेगु पुलांगु अडानयात अनुमोदन याःगु दु ।
मुँज्यालिपा पिथंगु १९ गू बुदाँया बाग्लुंग घोषणा पतिइ अख्तियार प्रमुखपाखे लोकमान सिंह कार्कीया चीकेमाःगु व आवंनिसें जनआन्दोलनया विरोधीयात नियुक्त मयायेत नं सरकारयात इनाप याःगु दु ।
शनिवाः समापन लिपा ज्याझ्वः जूगु थासय् पत्रकार सम्मेलन यासें १९ गू बुँदाया बाग्लुंग घोषणा पत्र २०७० जारी याःगु खः । उगु घोषणा पतिइ राजनीतिक नापं समसामयिक विषयस न्यागू बुँदात दुथ्यानाच्वंगु दु । गुकी प्रधानन्यायधिस पदपाखें खिलराज रेग्मीं राजीनामा बीमाःगु, लोकमान सिंह कार्कीया नियुक्ति बदर यायेमाःगु व भविष्यय् जनआन्दोलनया दोषीयात नियुक्त याये मजिउगु न्ह्यथनातःगु दु । अथेहे राजनीतिक लकस दयेकूसें अबिलम्ब चुनावया घोषणा यायेमाःगु नं बारं माग याःगु दु ।
परिषद मुँज्याया उलेज्या म्हिगः शुक्रवाः कायममुकायम प्रधानन्यायाधिस दामोदर प्रसाद शर्मां यानादीगु खः ।
