शाहीकालया बनमन्त्री एमाओवादीइ
समाजवादी पार्टीया केन्द्रीय नायः नापं शाहीकालया बनमन्त्री सलीम मिया अन्सारी एकीकृत नेकपा माओवादीइ दुहांवंगु दु ।
बाराया बरियापुरय् शनिवाः माओवादीं ग्वसाः ग्वःगु आमसभाय् अन्सारी थः स्वसःम्ह कार्यकर्तालिसें एकीकृत माओवादीइ दुहांवंगु खः । माओवादी नायः पुष्पकमल दाहाल प्रचण्डं सिन्हः तिकाः पार्टीइ दुकाःगु खः ।
एकीकृत माओवादीइ दुहांवनेधुंकाः आमसभायात सम्बोधन यानादिसें अन्सारीं नेपाली कांग्रेस व नेकपा एमाले टायर पञ्चर जूगु व स्यंगु गाडीया संज्ञा बियादीगु दु । मधेशवादी दलतय्सं नं सत्ता व धेबाया लागि सिनाच्वंगुलिं मधेसी जनताया अपेक्षा पूवंकेमफूगु द्वपं बियादिल ।
नेकपा एमालेय् च्वंगु इलय् बाराया क्षेत्र नं. ४ पाखें निक्वः तक सांसदय् त्याःम्ह अन्सारी पुलांम्ह जुजु ज्ञानेन्द्र शाहया शाही शासनया इलय् बनमन्त्री जुयादीगु खः ।
