राजीनामा बिउसा सरकार व चुनाव समस्याय् लाइगु : उपसभापति पौडेल
नेपाली कांग्रेसया उप सभापति रामचन्द्र पौडेलं नागरिक न्ह्यलुवातसें येँया बानेश्वरय् अलग्ग हे गणतन्त्र दिवस हंगुलिं आपत्ति प्वंकादीगु दु ।
नेपाल विद्यार्थी समाज लमजुंग येँ सम्पर्क समितिपाखें शनिवाः येँय् ग्वसाः ग्वःगु ज्याझ्वलय् न्ववानादिसें उपसभापति पौडेलं उकथं आपत्ति प्वंकादीगु खः । वय्कलं प्रधानन्यायधिसयात चुनावया जिम्मेवारी बी मजिउगु धयागु अज्ञानता जूगु धयादिसें डा. बाबुराम भट्टराईं सरकार त्वःतेत माने मजुयाच्वंगु व मेमेगु दलं भट्टराईयात माने मयागु विशेष परिस्थितिइ सरकार दयेकूगु सामान्य खँयात कयाः कानून व्यवसायी, कानुनविद्, नागरिक समाजं असमान्य दयेकूगु तसकं आपत्तिजनक जूगु धयादिल ।
उपसभापति पौडेलं मन्त्रीपरिषद्या नायः खिलराज रेग्मीं प्रधानन्यायधिसपाखें राजीनामा बिउसा सरकार व चुनाव समस्याय् लाइगु नं धयादिल ।
थःपिनिगु हे पार्टीया सभापति सुशील कोइराला लिसेंया नेतातय्सं रेग्मीया राजीनामा फ्वनाच्वंगु इलय् वरिष्ठ नेता शेर बहादुर देउवा व उपसभापति पौडेलं राजीनामा बी मजिउगु अडान कयाच्वंगु दु ।
