च्वमि डंगोलया "लोकतान्त्रिक आन्दोलन व नेपालभाषाया बुखँपौ"
च्वमि हरिकृष्ण डंगोलं च्वयादीगु "लोकतान्त्रिक आन्दोलन व नेपालभाषाया बुखँपौ" नांया सफू शुक्रवाः छगू ज्याझ्वःया दथुइ जनकवि दुर्गालाल श्रेष्ठ, नागरिक न्ह्यलुवा श्याम श्रेष्ठ व नेपालभाषा केन्द्रीय विभागया नायः सह प्रा. तुलसीलाल सिंहपिन्सं मंकाः पितब्वज्या यानादिल ।
जनकवि दुर्गालाल श्रेष्ठया सभाध्यक्षताय् जूगु उगु ज्याझ्वलय् मूपाहां कथं झायादीम्ह नागरिक न्ह्यलुवा श्याम श्रेष्ठ झायादीगु खः । मय्जु श्रृति शाक्यं च्वमि हरिकृष्ण डंगोलया म्हसीका न्ह्यब्वयादीगु खःसा ज्याझ्वलय् नेवाः न्ह्यलुवा नापं वरिष्ठ पत्रकार मल्ल के. सुन्दर, नेपालभाषा केन्द्रीय विभागया नायः सह प्रा. तुलसीलाल सिंह, सन्ध्या टाइम्स न्हिपौया संपादक सुरेश किरण मानन्धर, अप्सरा वाःपौया सम्पादक सुजीव वज्राचार्य, देशय्मरु झ्याः वाः पौया सम्पादक प्रदीपमान श्रेष्ठ, च्वमि हरिकृष्ण डंगोलपिन्सं थःथःगु नुगः खँ प्वंकादीगु खः ।
ज्याझ्वलय् न्ववानादिसें मल्ल के. सुन्दरं तथ्य व तथ्यांकया लिधंसाय् मिडियाबारे च्वयातःगु नेपालभाषाया थज्याःगु सफू आःतक पिदंगु मदुनि धयादिल । अथेहे नागरिक न्ह्यलुवाः श्याम श्रेष्ठं संचारकःमिपिनिगु पीडा थुकी दुमथ्याःगु खँ कुलादिलसा सुरेश किरणं थ्व सफू छगू मिडियाया नं वाचडग जूगु धयादिल ।
जनकवि दुर्गालाल श्रेष्ठं आन्दोलन सम्बन्धि कविता पाठ यानादीगु उगु ज्याझवः साँस्कृतिक संगीतपाखें शुरुवात जूगु खः ।
