बायर्न यूरोपियन च्याम्पियन

यूरोपियन च्याम्पियन्स लिगया उपाधि जर्मन क्लब बायर्न म्यूनिखं त्याकूगु दु ।

शनिवाः चान्हय् जूगु फाइनल कासाय् घरेलु प्रतिद्वन्दि बोरुसिया डर्टमुण्डयात छगूया विरुद्ध निगू गोलं बुकूसें बायर्न यूरोपियन च्याम्पियन जूगु खः ।

इंग्ल्याण्डया वेम्बली रंगशालाय् जूगु कासाया न्हापांगु हाफय तसकं प्रतिस्पर्धात्मक जूगु खः । तर छगू नं गोल मजुल । आर्जेन रोबिनया सशक्त निगू प्रहारयात बोरुसियाया गोलकिपरं असफल याना बिउगु खःसा रोबर्टो लेभान्डोस्सीया प्रहारयात बायर्नया गोलकिपरं पनाबिउगु खः ।

न्हापांगु हाफ गोलरहित जूगु उगु कासाया निगूगु हाफया ख्वीगूगु मिनेटय् मारिओ मान्जुकिया गोलपाखें बायर्न न्ह्यःने लाःगु खः । तर ख्वीन्हय्गूगु मिनेटय् बोरुसियायात वःगु पेनाल्टीयात इके गान्डोगनं सदुपयोग यायेवं कासा बराबरी जूगु खः । कासाया चय्गुंगूगु मिनेटय् आर्जेन रोबिनया गोलपाखें बायर्न म्यूनिखं उपाधि त्याकल ।

बायर्नया थ्व न्याक्वःगु उपाधि खः । सन् २०१० व २०१२ य् फाइनल तक थ्यंगु खःसां नं बायर्न उपाधिपाखें बञ्चित जूगु खः ।

च्याम्पियन्स उपाधि थुगु सिजनपाखें अवकास कयाच्वंम्ह बायर्नया प्रशिक्षक जप हेइनकेशया नितिं बिशेष जूगु दु । वयकलं हे बायर्नया नितिं थुगु सिजनया बुण्डेस लिगया उपाधि नं त्याकाबिउगु खः ।

More Stories Like this