धर्मादित्य सिरपा बसन्त महर्जनयात, हना गणेशराम लाछियात
मांभाय् पुचः यलं दँय्दसं बिया वयाच्वंगु “धर्मादित्य धर्माचार्य सिरपा व हना” थुगुसी छसिकथं भाजु बसन्त महर्जन व भाजु गणेशराम लाछियात बीगु जूगु दु ।
नेपालभाषाय् म्हो जक श्रृजना जुयाच्वंगु “नियात्रा” साहित्य नेपालभाषाया रंगीन वाःपौ “नेपाःसः” स “गन्तब्य” स्तम्भ मार्फत च्वसा न्ह्याका च्वंगुलिं च्वमि भाजु महर्जनयात थुगु दँया धर्मादित्य सिरपा लःल्हायेत्यंगु खः । अथेहे नेपालभाषालिसें नेवाः तजिलजियात नेपाःया दुने व पिने समेत प्रचार प्रसार याना नेवाः जातिया उत्थान यायेगु ज्याय् मदिक्क न्ह्याज्याना च्वनादीगुलिं थुगु दँया धर्मादित्य धर्माचार्य हनापाखें भाजु लाछियात नं हनेत्यंगु खः ।
नेपालय् थेरवादी बुद्ध धर्मयात दुतहया बुद्धधर्मया समग्र क्षेत्रय् हे बय्बय् यानादीम्ह व नेपालभाषाया न्हापांम्ह पत्रकार धर्मादित्य धर्माचार्यया नामं पलिस्था जुयाच्वंगु थुगु सिरपा थ्वहे वइगु ने.सं. ११३३ बछलागा अमाइ,(जुन ८, २०१३) शनिवाः खुन्हु ज्याझ्वः जुइगु ग्वसाः खलकं जानकारी ब्यूगु दु ।
