थौंनिसें आमरण अनसन च्वनेगु महतोया घोषणा
सद्भावना पार्टीया नायः राजेन्द्र महतो थौंनिसें आमरण अनसनय् च्वनीगु जूगु दु । सद्भावनाया नायः महतों संविधानसभा निर्वाचनया तिथि घोषणा लगायतया झिगू बुँदे मागप्रति सरकारं सुनवाई मयागु न्ह्यःथना थौंनिसें आमरण अनसन च्वनेगु निर्णय याःगु खः ।
सरकार निर्वाचनया जिम्मेवारीपाखें लिच्यूगु द्वपं बियाः महतों म्हिगः हे आमरण अनसनय् च्वनेगु घोषणा यानादीगु खः । बैशाख १९ गतेनिसें पार्टी प्रवक्ता सन्तोष मेहता व सुनसरी जिल्ला न्वकु देवराम यादव सुनसरीइ आमरण अनसनय् च्वनादीगु खः ।
बैशाख ३० गतेनिसें देय्या नीप्यंगू जिल्लाय् सद्भावनाया च्यय्प्यम्ह नेता कार्यकर्ता आमरण अनसनय् दुगु खः । मंसिरया नितिं निर्वाचनया तिथि घोषणा, निर्वाचन क्षेत्र हाकनं निर्धारण आयोग याकनं नीस्वनेमाःगु, नागरिकता वितरण निर्देशिका–२०७० संशोधन यानाः मांया नामं नं नागरिकता बीमाःगु लगायतया माग यानाः सद्भावना पार्टी आमरण अनसनयात निरन्तरता ब्यूगु दु ।
भारतीययात लाःलाःथे नागरिकता इनाब्यूगु बुखँ थीथी पत्र–पत्रिकाय् वयेवं उकिया प्रतिरक्षाया नितिं महतो थःहे आमरण अनसनय् च्वनेत्यंगु न्ह्यःथंगु खः ।
