धम्मावती गुरुमांया जीवनी उपन्यास ‘यःम्ह म्ह्याय्’ हानं पिदनीगु
नेवाः जागरण मञ्चं थःगु न्यादँ बुन्हिया लसताय् धम्मावती गुरुमांया जीवनी आधारित ‘यःम्ह म्ह्याय्’ सफू हानं प्रकाशन याइगु जूगु दु । बर्मी भिक्षु र दे थ्वं वर्मी भासं च्वःगु थुगु उपन्यास नेपालभाष व नेपाली भासं अनुवाद जुयाः पिदनाच्वंगु खः । बजारय् नेवाः भाय्या 'यःम्ह म्ह्याय्' सफू फुइधुंकूगुलिं जागरण मञ्चया पहलय् हानं पिदनेत्यंगु दु ।
अथेहे जागरण मञ्चं थःगु न्यादँ बुदिंया लसताय् धम्मावती गुरुमांयात हनेगु ज्याझ्वः तःगु दु । थुगु ज्याझ्वःया तयारीया झ्वलय् शनिवाः सुलक्षण कीर्ति विहारय् डा. अनोजा गुरुमांया सभापतित्वय् तयारी मुँज्या नं च्वंगु खः । उगु मुँज्याय् 'यःम्ह म्ह्याय्' हानं प्रकाशन यायेत सरस्वती बज्राचार्यपाखें न्यय्द्वः तका ग्वाहालि यायेगु बचं बियादीगु खः । जागरण मञ्चं जेठ महिनाया लिपांगु वालय् न्यादँ बुन्हि व हनाज्याझ्वः तःजिक यायेगु तयारी यानाच्वंगु दु ।
