मल्लया 'नेपाली राजनीति: पहिचानको मुद्दा’ पितब्वज्या
नेकपा (माओवादी)या अध्यक्ष मोहन वैद्य 'किरण', संघीय समाजवादी पार्टी नेपालया अध्यक्ष अशोक राई व एनेकपा (माओवादी)या नेता वर्षमान पुन 'अनन्त' पाखें नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दुरं च्वयादीगु "नेपाली राजनीतिः पहिचानको मुद्दा" नांया सफू छगू ज्याझ्वःया दथुइ उलेज्या यानादीगु दु ।
नेवाः स्वायत्त राज्य मंका सङ्घर्ष समितिया ग्वसालय् जुगू उगु ज्याझ्वःय् मुपाहाँतय्सं जातिय पहिचान दुथ्याःगु संघियताया विषयलय् यथास्थितिवादीतय्सं गलत प्रचार यानाच्वंगु इलय् थुगु सफुया महत्व यक्व दइगु व थुगु सफूपाखें उगु गलत प्रचारया खेतीयात समाप्त यायेफइगु बिचाः वक्तातय्सं प्वंकूगु खः । नापं पहिचान दुथ्याःगु सङ्घीय स्वायत्त राज्य नीस्वनेगु निंतिं वइगु निर्वाचनय् पहिचान पक्षधरपिं छधि छप्पं जुया न्ह्यावनेमाःगु बिचाः नं वय्कःपिंसं प्वंकूगु खः ।
नेवाः स्वायत्त राज्य मंका सङ्घर्ष समितिया नायः दिलिप महर्जनया नायसुई न्ह्याःगु उगु ज्याझ्वःलय् नेपाल जनजाति उत्थान प्रतिष्ठानया डा. लाल स्याँकार लाप्चा, नेवाः जागरण मञ्चया संयोजक सुजीव वज्राचार्य, पुलाम्ह सभासद् तिर्थराम डंगोल, मंगलसिद्धि मान्नधर, नेपाः राष्टिय पार्टीया नायः डा. केशवमान शाक्य, सङ्घीय समाजवादी पार्टी राजेन्द्र श्रेष्ठ लगायतया ब्वति दुगू खः ।
