व्यापारी अग्रवाल किपूया छगू निर्माणाधीन छेँपाखें सकुशल मुक्त
प्यन्हु न्ह्य येँया कलंकीपाखें अपहरणय् लाःम्ह निर्माण व्यापारी राजेशकुमार अग्रवालयात प्रहरीं थौं सकुशल मुक्त याःगु दु ।
महानगरीय प्रहरी, अपराध महाशाखाया पुचलं व्यापारी अग्रवालयात किपूया छगू निर्माणाधीन छेँपाखें फिरौती मब्यूसे मुक्त यायेत ताःलाःगु खः ।
प्रहरीं अपहरणय् ल्हाःदुपिं निम्हसित नं ज्वनेधुंकूगु दु । अपहरणय् ल्हाः दुगु द्वपनय् प्रहरीं जमिल उल्ला व मोहम्मद नसिरुदिनयात ज्वंगु खः ।
प्रहरीयाकथं, अपहरणय् ल्हाः दुपिं मेमेपिं स्वम्हसित मालेगु ज्या न्ह्यानाच्वंगु दु । महानगरीय प्रहरी आयुक्तया ज्याकू रानीपोखरीइ प्रहरीं थौं छगू पत्रकार सम्मेलन यानाः अग्रवाल अपहरणया घटना विवरण सार्वजनिक याःगु खः ।
अपहरणकारीतय्सं अग्रवालया अपहरण यानाः निगू करोड तका फिरौती फ्वंगु जूसां नं फिरौती मब्यूसे हे अग्रवालयात मुक्त यायेत ताःलाःगु प्रहरीं जानकारी ब्यूगु खः ।
