नेपाः-चीन व्यापार वार्ता
चीनलिसेया व्यापार घाटाया विषयसं सहलह यायेत नेपाः व चीनया ल्यू छ्याञ्जे स्तरीय अधिकारीपिनिगु दथुइ थौं वार्ता जूगु दु ।
वार्ताय् नेपालं सीमा क्षेत्रय् नेपाःमि व्यवसायीं फयेमाःगु समस्या, विशेष यानाः तातोपानी नाकाय् बैंकिङ सुविधा मदयाः जोखिमपूर्ण व्यवसाय यायेमाःगु बाध्यता दुगु न्ह्यःथना चीनिया पक्षया ध्यानाकर्षण याःगु खः ।
तातोपानी भञ्सार पुलेधुंकाः नेपाःमि निर्यातकर्तां भरिया कयाः थःपिनिगु उत्पादन खासापाखे यंकेमाःगु व्यवस्थायात याकनं अन्त्य यानाः ट्रकपाखें ढुवानी यायेगु सुविधा बीत नं नेपालं चीनिया अधिकारीपिंलिसेया वार्ताय् इनाप याःगु जानकारी ब्यूगु खः ।
चीनया स्वशासित क्षेत्र तिब्बतया बाणिज्य विभागया महानिर्देशक बियान्वा नेतृत्वया झिंछम्ह दुजः दुगु पुचःलिसे बाणिज्य लिसे आपूर्ति मन्त्रालयसं जूगु वार्ताय् चीनिया
पक्षं नेपाःमि अधिकारीं ल्ह्वंगु समस्या ज्यंकेगु नितिं केन्द्र व क्षेत्रीय सरकार दथुइ न्ह्यःब्वइगु आश्वासन ब्यूगु खः ।
वार्ताय् नेपाःमि प्रतिनिधिमण्डलया नेतृत्व बाणिज्य लिसे आपूर्ति मन्त्रालयया ल्यू छ्याञ्जे जीवराज कोइरालां यानादीगु खः । निगुलिं पुचलय् भञ्सार, बाणिज्य, परराष्ट्र व अर्थ मन्त्रालयया अधिकृतपिनिगु ब्वति दुगु खः ।
