गोदावरीइ छु सहमति जुल ?
मू विषय हे राष्ट्रपति व प्रधानसेनापति
येँ (सन्ध्या टाइम्स) / म्हिगः यलया गोदावरीइ जूगु प्रधानमन्त्री माधव नेपाल व पुलांम्ह प्रधानमन्त्री पुष्पकमल दाहाल 'प्रचण्ड' दथुया वार्तां क्वःछिउगु सहमति यदि गथे खः अथे हे पालना जुल धाःसा प्रधानसेनापति रुक्मांगद कटवालं नं थःगु कार्यकाल पूवने न्ह्यः हे अवकास काये मालीगु जुइ ।
सूत्रतय्सं बिउगु जानकारी कथं म्हिगः गोदावरीइ जूगु निगू पार्टीया वार्ताय् प्रधानसेनापति प्रकरण मदयेका छ्वयेगु लागिं एमालें न्हापा हःगु रोडम्याप हे लागू यायेगु सहमति जूगु दु । उगु रोडम्याप कथं प्रधानसेनापति कटवाल व सेकेण्ड म्यान जुयाच्वंम्ह कुलबहादुर खड्का निम्हेसितं कार्यकाल फुइ न्ह्यः हे सम्मानजनक रुपं चीकेगु ज्या जुइ । अनं चीकाः कटवालयात न्ह्यागुसां छगू देशया राजदूत व खड्कायात सरकारया हे छगू निकायय् नियुक्ति बीगु ज्या जुइ । अले कामु प्रधान-सेनापतिया रुपय् थर्डम्यान जुयाच्वंम्ह छत्रमान गुरुङयात हयेगु जुइ ।
अथे हे मेखे प्रधानसेनापतियात हटे मयायेगु राष्ट्रपतिया पलाःयात भिंकेगु सवालय् नं म्हिगः सहलह जूगु दु । सूत्रं धाः कथं राष्ट्रपतिया पलाः भिंकेगु लागिं राष्ट्रपतिपाखें प्रधानसेनापति कटवालयात गुगु पौ च्वया छ्वःगु खः उकियात सरकारं अनुमोदन नं मयायेगु व विरोध नं मयायेगु नीति काःगु दु । अथे हे माओवादीं हःगु संकल्प प्रस्तावया बारे नं थ्वहे नीति कायेगु खँ जूगु दु ।
यदि राष्ट्रपितं सेनापतियात च्वःगु पौयात वर्तमान सरकारं अनुमोदन जक मयात धाःसां नं नागरिक सर्वोच्चता कायम जूगु ठहर जुइ धइगु माओवादीया बिचाः दु ।
यदि प्रधानमन्त्री माधव नेपालं थुलि ज्या यात धाःसा माओवादीं संसद न्ह्याकेगु जक मखु सरकारयात ग्वाहालि यायेगु तक ज्या जुइफु धाःगु दु । प्रम नेपालं आः थ्वहे प्रस्ताव नेपाली कांग्रेस व थःगु हे पार्टी दुने नं तयाः सहलह ब्याका स्वये धयादीगु दु । छुं जुयाः कांग्रेस नं थुकी सहमत जुल धाःसा जक थ्व रोडम्याप कथं वनाः समाधान लुइके फइगु खँ सूत्रं धाःगु दु ।
