प्यक्वःगु "सत्यहेरा सिरपाः" रत्नतारा व प्रकाशयात लःल्हात

नेवाः जातिया भाषा, लिपि, संस्कृति, कला आदिया संरक्षण व सम्बद्र्धन नापं अनुसन्धनात्मक प्रबृत्तिया विकास यायेगु व अनुसन्धान यायेगु ज्याय् हःपाः बीगु तातुनां नीस्वनातःगु "सत्यहेरा अनुसन्धान सिरपाः" मंगलवाः छगू ज्याझ्वःया दथुइ मय्जु रत्नतारा ताम्राकार व भाजु प्रकाश शाक्ययात लःल्हात ।

नेपालभाषा केन्द्रीय विभाग, यलय् जूगु उगु ज्याझ्वलय् मूपाहां नापं यल उपमहानगरपालिकाया प्रमुख नापं कार्यकारी अधिकृत मोहननाथ मास्कें मय्जु ताम्राकार व भाजु शाक्ययात सिरपाःया दसिपौ लःल्हानादीगु खःसा दाता मय्जु उजेली डंगोलं निम्हेसितं झिद्वः/झिद्वः तका दां लःल्हानादीगु खः ।

सिरपाः "श्री शान्तिघट बज्रधातु चैत्य महाविहार श्रीघः बहाःया ताःचाः" कृतिया नितिं मय्जु ताम्राकार व "नेपाल खँग्वःया ब्यूत्पत्ति नेवाःभाषाय्" कृतिया नितिं भाजु शाक्ययात उगु सिरपाः लःल्हाःगु खः ।

सत्यहेरा सिरपाः समितिया नायः नापं नेपालभाषा केन्द्रीय विभागया नायः सह-प्रा. तुलसीलाल सिंहया सभाध्यक्षताय् जूगु उगु ज्याझ्वलय् समितिया दांभरि हिराकाजी महर्जनं सिरपाः लःल्हायेगु ज्यायात निरन्तरता बीगु नितिं समितियात ख्वीद्वः व च्यासः तका बीगु घोषणा यानादीगु दु । वय्कलं सिरपाःया अक्षयकोष प्यंगू लख तका थ्यंकेगु ग्वसाः दुगु नं जानकारी बियादीगु दु ।

समितिया दुजः प्रा. प्रेमशान्ति तुलाधरं लसकुस यानादीगु उगु ज्याझ्वलय् लुम्बिनी बौद्ध विश्वविद्यालयया उपकुलपति प्रा. डा. त्रिरत्न मानन्धर, सिरपाः त्याकादीपिं मय्जु रत्नतारा ताम्राकार व भाजु प्रकाश शाक्यं नं थःथःगु नुगः खँ प्वंकादीगु खः ।

सिरपाःया नितिं थुगुसी मुक्कं च्यागू अनुसन्धानमूलक कृति दुहांवःगु खःसा उगु कृतियात कयाः लुम्बिनी बौद्ध विश्वविद्यालयया उपकुलपति प्रा. डां त्रिरत्न मानन्धरं मूल्यांकन यानादीगु खः ।

ज्याझ्वलय् पाटन संयुक्त क्याम्पस प्रमुख अमन श्रेष्ठ, नेवाः अर्गनाइजेशन अफ अमेरिकाया सिजन श्रेष्ठ, पासा पुचः लण्डनया दुजः नापं आपालं नेपालभाषासेवीपिनिगु उपस्थिति दुगु खः ।

दँय्दसं चौलाथ्व द्वादशी कुन्हु बीगु सत्यहेरा अनुसन्धान सिरपाःया नितिं थुगुसी सिरपाः त्याकूगु निगू कृति लिसें त्रैलोक्यमान बनेपालीया "मूलदेवशशिदेवोपाख्यान", सुनीता राजभण्डारीया "पृथुपाख्यान नाटक", अमीता डंगोलया "किपूया त्वाःबहाः", प्रेमरत्न बज्राचार्यया "रत्नकेतु महाविहारया प्रबज्या विधि", लसता सिंया "सक्वया गथांमुगः" व लक्ष्मीदेवी श्रेष्ठया "सिद्धिपुर (थसि)या धिमय् खलः" अनुसन्धानमूलक कृति दुहांवःगु खः ।

More Stories Like this