म्यानचेष्टर युनाइटेड इंग्लीस प्रीमियर लिग च्याम्पियन

म्यानचेष्टर युनाइटेड इंग्लीस प्रीमियर लिग च्याम्पियन जूगु दु । सोमवाः चान्हय् जूगु कासाय् रोविन भानपर्सिया ह्याट्रिकया ग्वाहालिं एष्टन भिल्लायात स्वंगू गोलं बुकूसें म्यानचेष्टर युनाइटेड प्यंगू कासा ल्यंदनीगु इलय् हे २० क्वःखुसी प्रीमियर लिगया उपाधि पक्का याःगु खः ।

२० क्वःखुसी युनाइटेडं प्रीमियर लिगया उपाधि त्याकूगु इलय् २० नम्बरया जर्सीइ दुम्ह भानपर्सी नायक जूगु खः । छगू संयोग हे धायेमाः, कासाया स्वंगूगु मिनेटय् युनाइटेडया नितिं न्हापांगु गोल याःम्ह भानपर्सिं १३ गूगु व ३३ गूगु मिनेटय् गोल यानाः ह्याट्रिक पूवंकूगु खः ।

थुगु कासाया नापनापं लिगय् भानपर्सिया गोल ल्याः २४ गू थ्यंगु दु । भानपर्सियात प्लेयर अफ दि इयर व गोल्डेन बुटया दाबेदारी कथं कयातःगु दु । भानपर्सियात युनाइटेडया म्यानेजर एलेक्स फग्र्युसनं थगुने आर्सनलपाखें ओल्ड ट्राफोर्डय् हःगु खः ।

थ्वहे झ्वलय् इंग्लीस फुटबलया सफल म्यानेजर फग्र्युसन सन् १९८६ इ म्यानचेष्टर युनाइटेड वःगु खःसा वय्कलं आःतक १३ गू प्रीमियर लिगया उपाधिया लिसें ३८ गू ट्रफि युनाइटेया नितिं त्याकाबीधुंकूगु दु ।

More Stories Like this