खास्तिइ नेवाः छेँ
- राजेन्द्र शाक्य
खास्ति नेवा: पुचलं थ:गु भवन दनाच्वंगु दु। शनिवाः नेवा: पत्रकार राष्ट्रिय दबूलिसे जूगु परिचयात्मक ज्याझ्वलय् खास्ति नेवा: पुचलं यानावयाच्वंगु थीथी ज्याझ्व: लिसें दनाच्वंगु छेँया बारे जानकारी बिउगु ख:। पुच:या नाय: तुल्सीनारायण श्रेष्ठं दान बियादीगु एक आना एक पैसा जग्गाय् भवन दनाच्वंगु खास्ति नेवा: पुच:या संस्थापक नाय: मदन शाक्यं कनादिल। खास्ति लागाय् नेवा:त व तामाङ्गत छधी जुया: च्वनावयाच्वंगु व पुच:या छेँ दनेत दकलय् न्हापां तामाङ्ग समुदाययापिन्सं हे ध्यबा ग्वाहालि बिउगु शाक्यं कनादिल।
आ:तक पुच:यात नेवा:तय्संसिबें अप्व: स्थानिय तामाङतय्सं हे ग्वाहालि यानावयाच्वंगु संस्थापक नाय: लिसें भवन निर्माण समितिया कजी शाक्यं कनादिल। छेँ दनेत मुक्कं खुगू लख ति ध्यबा खर्च जुइगु अनुमान खास्ति नेवा: पुच:या माधव स्यस्य: नं यानादिल ।
ज्याझ्वलय् न्वंवासें नेपालजीत लामां खास्ति लागाय् न्हापांनिसें हे नेवा: व तामाङ समुदाय छधी जुया: थ:थवय् ग्वाहालि यानावयाच्वंगु दु धयादिल। अथेहे, टासी कुमार लामां लिच्छवीकालंनिसें हे नेवा: व तामाङ्गतय् दथुइ ला व लुसिया स्वापू दयावयाच्वंगु धासें राजनैतिक, भौगोलिक, आर्थिक व बौद्धिकरूपं न्ह्यांवनेत निगुलिं समुदाय मिले मजुइकं मगा: धयादिल। २०दं मल्याक्क न्ह्यवंनिसें खास्तिइ च्वनावयाच्वनादीम्ह साहित्यकार भगतदास श्रेष्ठं नेवा: व तामाङतय् दथुइ ग्वाहालि कालबिल जुइमा: धयादिल । विशेषयाना: सुरक्षाया खँय् नेवा: व तामाङतय्सं थ:थवय् ग्वाहालि याय्मा:गु श्रेष्ठं धयादिल ।
नेवा: पत्रकार राष्ट्रिय दबूया केन्द्रीय नाय: श्रीकृष्ण महर्जनं खास्तिलागां नेवा: तामाङ समुदाय छधी जुयाच्वंगुया बांला:गु दसु न्ह्यब्वयाच्वंगु दु धयादिल। नेस १११९य् नीस्वंगु खास्ति नेवा: पुचलं दँय्दँसं न्हूदँबले मोटरसाईकल र्याली पिथना: पूर्वीलागाया सुन्दरीजल, सक्वतक चा:हिलेगु यानावयाच्वंगु दु। खास्ति लागाय् नेवा: व तामाङतय्सं मंका:कथं न्हूदँ हनावयाच्वंगु दु ।
