वार्ताय् च्वनेगु अर्थ मदु : नेकपा-माओवादी
अन्तरिम चुनावी मन्त्रिपरिषद्ं वार्ताया नितिं याःगु औपचारिक प्रस्तावयात नेकपा-माओवादीं अश्वीकार याःगु दु । माओवादी नाय मोहन वैद्यं थौं छगू विज्ञप्ती पिकयाः यथास्थितिइ सरकारलिसे याइगु वार्ताया छु नं अर्थ मदइगु धयादिसें वार्ताया प्रस्ताव अश्वीकार यानादीगु खः । सरकारं वंगु बैशाख ३ गते नेकपा–माओवादीयात औपचारिक पौ च्वया वार्ताया नितिं इनाप याःगु खः ।
वार्ता व सम्वादपाखें हे राजनीतिक निकास मालेमा धइगु खँय् पार्टी स्पष्ट दुसां नं राष्ट्रपतिं न्ह्याकूगु चैत्र १ या असम्बैधानिक पलाः व प्यंगू दल दथुइ जूगु सहमतिया खारेज मजुत्तले वार्ताय् च्वनेगुया अर्थ मदइगु वैद्यं जानकारी बियादीगु खः ।
नायः वैद्यं असम्वैधानिक आदेशया खारेजी बारे सहलह यायेत तयार जुइगु वा मजुइगु धइगु हे आःया वार्ता सम्बन्धी मू विषय जूवंगु धयादिसें सरकारं चैत्र १ गतेया प्रतिगामी व असम्वैधानिक पलाःया पृष्ठभूमिइ पिकाःगु नीन्यागू बुँदे आदेशया मार्गचित्र कथं ग्वसाः ग्वइगु कथित संविधानसभाया निर्वाचन सम्बन्धय् वार्ता यायेत स्वःगुलिं अज्याःगु प्रस्तावित वार्ताया छु नं औचित्य मदइगु धयादीगु खः ।
वैद्यं थःपिनिगु छक्वःपतिकंया राजनीतिक दलत दथुइया गोलमेच सभाया माध्यमपाखें राजनीतिक निकास पिकायेत याःगु इनापयात बेवास्था यानाः प्यंगू दलीय सिन्डिकेटपाखें अन्तरिम संविधानयात अपाङ्ग दयेकेगु ज्या याःगु अवस्थाय् वार्ता यायेगुया अर्थ मदइगु प्रष्ट यानादीगु खः ।
वय्कलं वार्तायात सार्थक दयेकेगु खःसा असम्वैधानिक पलाःत भिंकाः वार्ताया ग्वसाः ग्वयेमाःगु खँय् बहः नापं बियादीगु दु ।
