नेकपा–माओवादी थप संघर्षया ज्याझ्वःलिसे आन्दोलनय्
प्यंगू दलीय सिन्डिकेट व राष्ट्रपतिया असम्वैधानिक पलाःया विरुद्ध आन्दोलनय् कुहांवःगु नेकपा–माओवादी नेतृत्वया स्वीस्वंगू दलिय गठबन्धनं थप संघर्षया ज्याझ्वः घोषणा याःगु दु ।
थौं नेकपा–माओबादीया मू ज्याकू बुद्धनगरय् च्वंगु स्वीस्वंगू दलीय गठबन्धनया बैठकं न्ह्यानाच्वंगु आन्दोलनयात प्रभावकारी दयेकेत थप संघर्षया ज्याझ्वः घोषणा याःगु खः । अन्तरिम चुनावी मन्त्रिपरिषद् सःतूगु वार्ताय् ब्वतिया औचित्य मदुगु न्ह्यःथना उमिसं आन्दोलनया ज्याझ्वः घोषणा याःगु खः ।
घोषित आन्दोलनया ज्याझ्वः अन्र्तगत कन्हय् आइतबाः निर्वाचन आयोगया प्रमुख नीलकण्ठ उप्रेतीलिसे नापलानाः किपालिसेया मतदाता नामावली संकलनयात आःथत्थेंया नितिं दीकेत इनाप यानाः ज्ञापन पौ लःल्हायेगु, १४ गते सरकारं हयेत्यंगु बाधा अड्काउ फुकाउ ऐन व निर्देशिकाया विषयसं येँय् नागरिक समाज व बुद्धिजीविपिंलिसे सहलह यायेत गोष्ठीया ग्वसाः ग्वयेगु लगायतया दु ।
निर्वाचन आयोगं बैशाख ८ गतेनिसें नामावली संकलन यायेगु तयारी यायेवं थज्याःगु प्रक्रिया पनेत उमिसं माग यायेत्यंगु खः ।
अथेहे, बैठकं बैशाख १६ गते विराटनगरय् दुगु भारत सरकारया क्याम्प ज्याकू चीकेमाःगु मागलिसे भारतीय दूतावासय् ज्ञापन पौ लःल्हायेगु, वर्तमान रेग्मी सरकारया खारेजी, बाधा अड्काउ फुकाउ अध्यादेशया विरोध व राष्ट्रिय स्वाधिनताया रक्षाया नितिं मेचीनिसें महाकालीपाखें निगू पुचलं राष्ट्रिय मार्च पास यायेगु ज्याझ्वः नं क्वःछ्यूगु दु ।
छक्वःपतिकं थःपिनिगु मागया विषयसं सरकारया ध्यानाकर्षण याकूसां नं मागयात कयाः न्वंवायेगुपाखे च्यूताः मक्यंगु न्ह्यःथना उगु दलतय्गु बैठकं आन्दोलनय् वनेगुया विकल्प मदुगु दाबी याःगु दु । बैठकं प्यंगू दलीय सिण्डिकेटया अन्त्य जुइमाःगु न्ह्यःथना उच्च स्तरीय राजनीतिक संयन्त्र खारेज यायेत हाकनं बहः ब्यूगु दु ।
