पोखराय् नं हन सिक्किम नेवाः गुथियात

पोखरां नेपालमण्डल डट कमया विशेष स्थलगत रिपोर्टिङ

नेवाःतय्गु राष्ट्रिय संगठन नेवाः देय् दबूया ब्वनाय् नेपाः भ्रमणय् वःगु सिक्किम नेवाः गुथियात पोखराय् छगू ज्याझ्वःया दथुइ हंगु दु ।

भारतया सिक्किम राज्यय् नेवाःतय्गु म्हसिकाया नितिं मूवंगु भूमिका म्हिताच्वंगु सिक्किम नेवाः गुथियात पोखराया नेवाः तजिलजि दबूपाखें हनेगु ज्या जूगु खः । दबूया नायः विश्व शंकर खौंजुया नायसुइ न्ह्याःगु ज्याझ्वलय् मूपाहाँ प्राज्ञ नापं वरिष्ठ कवि सरुभक्त श्रेष्ठं सिक्किम नेवाः गुथिया नायः रोहित कुमार प्रधान नापं वय्कःया नेतृत्वय् झाःपिं नीनिम्हेसिया पुचःयात लसकुस याना लुमन्ति चिं लःल्हाना हनादीगु खः । ज्याझ्वलय् पोखराया नेवाः तजिलजि दबूपाखें नायः खौंजुं सिक्किम नेवाः गुथिनाप भगिणी सम्वन्धया प्रस्ताव तयेगु ज्या जूगु खः ।

उगु ज्याझ्वलय् गुथिया नायः प्रधानं सिक्किमय् वना थ्व प्रस्तावयात नायःया हैसियतं थःम्हं मुँज्याय् तया स्वीकृति याकेगु कुतः यायेगु आश्वासन बियादिल । नापं वय्कलं सिक्किमय् नेवाःतय्गु अवस्था व नेवाःतय्सं थःगु म्हसिका ल्यंकातयेगु नितिं छु गुकथं ज्या जुयाच्वन धैगु बारे जानकारी बियादीगु खः ।

थुगु हे ज्याझ्वलय् दबूपाखें नेवाः बाद्यवादन सांस्कृतिक प्रतिष्ठान पलिस्था यायेगु नितिं कजि सुनेना पालिखें याःगु प्रस्ताव पारित याना प्रा.डा. विश्व श्रेष्ठया नायसुइ गुम्हेसिया ज्यासना पुचः दयेका प्रतिष्ठान स्थापना जूगु घोषणा नं याःगु खः ।

ज्याझ्वलय् नेवाः देय् दबूया नायः नरेश ताम्रकारं छुंनं नेवाः खलः, पुचः, नीस्वने अःपु तर वयात न्ह्याके वा नीरन्तरता बीत थाकूगु हुनिं संस्था दीनावनीगुयात ध्यानय् तया थुगु प्रतिष्ठान अथे मदीसे मदिक्क न्ह्यज्याये फयेमा व ज्वःमदुगुदु दसू जुयेफयेमा धकाः भिंतुना बियादिल । अथेहे सिक्किम व नेपाः दथुइया समन्वय्कर्ता गणेशराम लाछिं नेवाःतय्सं थःगु म्हसिका त्वतावनाच्वंगु खँयात कया चिनाखँपाखें ध्याचू नका नेपाः व सिक्किमय् जुयाच्वंगु ज्याखँ व सम्वन्धया बारे ध्वाथुइकादीगु खः । अथेहे मूपाहाँ श्रेष्ठं प्रतिष्ठान स्थापना व सिक्किमनाप भगिणी सम्वन्ध तःगु खँय् थःगु समर्थन बियादिसें थःपिं नेवाः जुया नं नेवाः भाय् मस:गुया हुनि कनादिसें सहज वातावरण मदुगुलिं थःपिं ल्यूने लाःगु खँ कनादिल ।

सिक्किम नेवाः गुथियात बिहीवाः हे सुथय् येँनं पाखेरा वनेगु झ्वलय् लँ दथुइ आँबु खैरेनीया लुमन्ति पुचः, तनहुँया दमौलीइ जनभावना नेवाः खलः व खैरेनिटारय् श्रीकृष्ण सृजनशील नेवाः खलः पाखें बाजागाजा नापं ख्येँ सगं बिया लसकुस याःगु खः ।

News Location: