नेवाः देय् दबुलिं तःजिक हन सिक्किम नेवाः गुथियात

जःलाखःला देय् भारतया सिक्किम राज्यय् निगू दशक न्ह्यवःनिसें नेपालभाषा, कला, संस्कृति, संस्कार आदि आदि प्रचार प्रसार यायेगु लिसें दैनिक जीवनय् समेत छ्यलाबुलाय् हयाच्वंगु सिक्किम नेवाः गुथियात बुधवाः छगू ज्याझ्वःयासें तःजिक हन । नेवाःतय् राष्ट्रिय संगठन नेवाः देय् दबुलिं यलया ज्यापु प्रज्ञाभवनया हलय् थ्व हनेज्या याःगु खः ।

ई. भाजु रोहित कुमार (आर.के.) प्रधानया नेतृत्वय् गुथिया २२ म्हसिया टोलि म्हिगः येँय् थ्यंकःझाःगु खः । वय्कःपिंत ज्याझ्वःया मू पाहाँ नेपालभाषा एकेदेमिया चान्सलरलिसें संस्कृतिविद् डा. सत्यमोहन जोशीं बेतालिं चिकाः दोसल्लां न्यय्कुसें हनापौ देछायादीगु खः ।

हनापौं लःल्हाना कयादिसें सिक्किम नेवाः गुथि, सिक्किम सेन्ट्रल कमिटीया नायः भाजु आर.के.प्रधानं नेवाः भाय्‌या प्रचार यायेगु ज्याय् न्ह्यज्यानांच्वंसां थःम्हसें धाःसा नेवाः भाय् ल्हाये मसःगु खँय् दुःख प्वंकादिल । याकनं हे थःम्हसिनं नं नेवाः भाय् ल्हायेसयेकेगु प्रतिवद्धता प्वंकादिसें थजाःगु ज्याझ्वलं थःत नेवाः भाय् ल्हाये सयेकेगुलिं अझ तिबः जुयाब्यूगु खँ कनादिल ।

प्यदँ न्ह्यः सिक्किमय् नेवाः हेरिटेज एण्ड कल्चरल भवन दयेकेत शिलान्यास यानागु व व ज्या बुलुहुँ न्ह्यानाच्वंगु दु धयादिसें थ्व नेवाः हेरिटेज एण्ड कल्चरल भवन याकनं सिधइगु व थुकिंयानां सकल नेवाःतय्त गर्व जुइगु खँ कनादिल । १३ गू स्कूलय् नेपालभाषा ब्वंकाच्वनागु व प्रत्येक दँय् इन्द्रजात्रा कुन्हु कुमारीया खः साला कुमारी याः न्यायेकाच्वनागु खँ कनादिसें थ्वहे सन् २०१२ निसें इन्द्रजात्रा कुन्हु सरकारी बिदा दुगु लसताया खँ नं कनादिल । थुकथं नेपालभाषा, कला, संस्कृति व संस्कारयात निरन्रता बियावनेगु प्रतिबद्धता नं प्वंकादिल ।

ज्यापु समाज, यलया नायः भाजु मंगल महर्जन, न्हापांम्ह न्वकू भाजु प्रेम महर्जन व मू पाहाँ डा.भाजु सत्यमोहन जोशी थःगु नुगः खँ प्वंकादीगु थुगु ज्याझ्वः नेवाः देय् दबूया नायः भाजु नरेश ताम्राकारया सभापतित्वय् जूगु खः ।

नेवाः देय् दबूया मय्जु धर्मशोभा तुलाधरं लसकुस यानादीगु थुगु ज्याझ्वः ज्यापु समाज, यलया छ्याञ्जे भाजु सन्तकुमार महर्जनं न्ह्याकादीगु खः ।
ज्याझ्वः क्वचाय्काः थीथी साँस्कृतिक ज्याझ्वः नं जूगु खः ।

More Stories Like this