जागरण मञ्चपाखें एसएसपी कायस्थयात लसकुस
उपत्यका अपराध अनुसन्धान महाशाखाया प्रमुख प्रहरी वरिष्ठ उपरीक्षक विजय कायस्थयात नेवाः जागरण मञ्चं वंगु शनिवाः क्षेत्रपाटी पार्टी प्यालेसय् लसकुस व परिचयात्मक ज्याझ्वः यात ।
प्रहरी वरिष्ठ उपरीक्षक कायस्थया कार्यकाल ताः लायेमा व नेवाः समुदाययात थःगु थासं बांलाःगु ज्या यायेफयेमा धासें जागरण मञ्चया संयोजक सुजीव बज्राचार्यं भिंतुना देछानादीगु खः ।
उगु ज्याझ्वलय् उद्योगपति, समाजसेवी लक्ष्मीदास मानन्धर, पुलांम्ह वायुसेवा निगमया कार्यकारी प्रमुख सुगतरत्न तुलाधर, पूर्वजनप्रतिनिधिपिं १७ वडाया महेन्द्रविलास जोशी, विजय माली, ३० वडाया चिनियामान बज्राचार्य, २८ वडाया सुभानकुमार श्रेष्ठलिसें थीथी संघसंस्था, क्लवया प्रतिनिधिपिनिगु उपस्थिति दुगु खः ।
लसकुस ज्याझ्वलय् प्रहरी वरिष्ठ उपरीक्षक विजय कायस्थं थःत लसकुस याःगुलिं सुभाय् देछासें प्रहरी प्रशासनय् छुं नं कथंया अनावश्यक दुःख सुयातं बिल धाःसा थःपिं न्ह्याबलें पनेत न्ह्यचिलेगु बचं बियादिल । वय्कलं नेवाःत राज्यया फुक्क क्षेत्रय् दयेमाःगु व थुकिया नितिं जागरण मञ्चं विशेष ज्याझ्वः दयेकाः न्ह्यायेमाःगु सुझाव बियादीगु खः ।
