जनबहाद्यः जात्राया लागि समिति

थुगुसीया जनबहाःद्यःया रथजात्रा तःजिक हनेगु नितिं वंगु शनिवाः येँया क्षेत्रपाटी पार्टी प्यालेसय् नेवाः जागरण मञ्चया पहलय् जात्रालिसे सम्बद्ध थीथी संघसंस्थाया प्रतिनिधि व जात्रा जुइगु लागाया संघसंस्थातय्गु बृहत भेलापाखें जनबहाःद्यःया पुजारी नीलकाजी शाक्यया कजिसुइ छगू सेतो मच्छिन्द्रनाथ रथजात्रा ११३३ समारोह समिति नीस्वंगु दु ।

उगु समितिइ पूर्वसभासद्पिं हिसिला यमि, हितमान शाक्य, ध्यानगोविन्द रञ्जित, तीर्थराम डंगोल, नविन्द्रराज जोशी, डा. मंगलसिद्धि मानन्धर, बुद्ध साय्मि, नेकपा एमालेया केन्द्रीय सदस्य कृष्णगोपाल श्रेष्ठ, पूर्व वडाध्यक्षहरु पवित्र बज्राचार्य, विद्यासुन्दर शाक्य, विजयकृष्ण श्रेष्ठ, चिनियामान बज्राचार्य, विकासभक्त श्रेष्ठ, बाबुराजा महर्जन र सुभानकुमार श्रेष्ठपिं सल्लाहकारया रुपय् च्वनादीगु दु ।

समितिया सचिवय् नेवाः जागरण मञ्चया अध्यक्ष सुजीव बज्राचार्य च्वनादीगु दुसा सदस्यय् नेवाः राष्ट्रिय मुक्ति मोर्चाया उमेश स्थापित, असन सेवा समितिया यज्ञ तुलाधर, बालकुमारी खेल मण्डलया किरण महर्जन, मच्छिन्द्र क्लवया जीवेन्द्रलाल कर्माचार्य व प्रबोध कसाः, इन्द्रचोक क्लवया कृष्णमान सिंह व रज्जुतम श्रेष्ठ, महादेव मखन क्लवया विनोद तुलाधर, तारिणी मखन क्लवया राजन महर्जन, मरुत्वाः पुचःया बसन्त श्रेष्ठ, ज्याःबहाः ल्याय्म्ह पुचः दिव्यरत्न बज्राचार्य व सुरेन्द्र महर्जन, चिकंमू क्लवया रामहरी रञ्जित व रमेश महर्जन, नेवाः जागरण मञ्चया राजेश्वर स्थापित, सूर्यबहादुर श्रेष्ठ व अमृत ताम्राकार, गंगा क्लवया दिगम्बर श्रेष्ठ, मासंगाः नेवाः पुचःया नरेश महर्जन, भिंतुना गुथिया विक्रम ताम्राकार, क्षेत्रपाटी क्लवया सत्यनारायण डंगोल, शहीद शुक्र क्लवया विकास स्थापित, श्री नरसिंह टोल सुधार समितिया रब्बु स्थापित, योङ स्टार क्लवया खगेश रञ्जित, स्टार क्लवया चन्द्रकुमार महर्जन, झी न्हाय्कंत्वाः पुचः राजीव राजोपाध्याय, विद्यूत प्राधिकरणया दिनेश वैद्य व तुलसी मानन्धर, काठमाडौं महानगरपालिकाया इन्द्रमान सिं सुवाल, लकस म्हालासाला पुचःया गणपतिलाल श्रेष्ठ, इन्द्रजात्रा व्यवस्थापन समितिया गौतम शाक्य, जैशीदेवल क्लवया महेन्द्र कर्माचार्य, किरण श्रेष्ठ व वाईएफएन नेपालया राजेश बानियाँ च्वनादीगु दु ।

परम्परा अनुसार थुगु दँय् न जनबहाद्यः जात्रा चैत्र शुक्ल अष्टमी अर्थात २०७० बैशाख ५ गते विहिवार येँया तीन धारा पाठशालां न्ह्याइगु थुगु जात्रा स्वन्हुतक न्ह्याइ । जात्रा तःजिक न्यायेकेगु नितिं स्वयम्सेवक परिचालन, ट्राफिक व्यवस्थापन, सुरक्षा निकायलिसे समन्वय, सञ्चार, मनपानाप समन्वय, ताय् अबिर ह्वलेज्या, विशिष्ट व्यक्तित्व ब्वना, बैठक व्यवस्थापन, समापन कार्यक्रम, रेडक्रस, स्काउट परिचालन आदिया भाला बीगु नितिं चैत्र २७ गते समितिया मुँज्या च्वनेत्यंगु दु ।