जर्मन लिगया उपाधि बायर्न म्यूनिखयात

बायर्न म्यूनिखं जर्मन बुण्डसा लिगाया उपाधि त्याकूगु दु ।

वंगु चान्हय् जूगु कासाय् फ्रान्कफर्टयात छगू गोलं बुकूसें बायर्न म्यूनिखं खुगू कासा म्हिते ल्यंदनीगु इलय् हे उगु उपाधि त्याकूगु खः । कासाय् ५२ गू मिनेटय् बायर्नया बास्टियं विजयी गोल याःगु खः ।

थुगु सिजनय् छगू जक कासा बूगु बायर्न म्यूनिखं नीप्यंगू कासा त्याकूगु दुसा स्वंगू कासा बराबरी म्हितूगु खः । विन्टर ब्रेक लिपाया झिंछगू हे कासा बायर्नं त्याकूगु खः ।

म्यूनिखया २८ गू कासापाखें ७५ गू ल्याः थ्यंगु दुसा निगूगु थासय् लानाच्वंगु साविक विजेता बोरुसिया डर्टमुण्डया मुक्कं ५५ गू ल्याः जक थ्यनाच्वंगु दु ।

थ्वहे झ्वलय् जुन महिनानिसें पद त्वःतेगु घोषणा यायेधुंकूम्ह ६७ दँया प्रशिक्षक जुप हाइनेक्सं उपाधिया नापं लिगपाखें बिदाइ काइगु पक्का जूगु दु । वइगु सिजनय् हाइनेक्सया थासय् बार्सिलोनाया पुलांम्ह प्रशिक्षक पेप ग्वार्डिओलां काइगु जूगु दु ।

More Stories Like this