असारय् चुनाव मजूसा आन्दोलन : प्रचण्ड
एकीकृत नेकपा माओवादीया नायः पुष्पकमल दाहाल प्रचण्डं असारय् चुनाव मजूसा मंसिरय् नं मजुइगु धयादीगु दु ।
एमाओवादीं शनिवाः जनजागरण अभियान अन्तरगत धादिंगय् ग्वसाः ग्वःगु आमसभाय् न्ववानादिसें नायः प्रचण्डं उगु खँ धयादीगु खः । वय्कलं एमाओवादीं चुनाव त्याइगु अवस्था दत्तले मेमेगु दलं चुनाव याये चाहेमजूगु दावी नं यानादिल ।
नायः प्रचण्डं असारय् चुनाव जुइके मबीगु षडयन्त्र जुयाच्वंगु नं द्वपं बियादिसें देयन्यंकं कांग्रेस व एमालेया कार्यकर्ता नापं नेता माओवादीइ दुहांवयेगु शुरु जुइवं चुनाव स्यंकेगु षडयन्त्र नं शुरु जूगु धयादिल ।
सम्बोधनया झ्वलय् असारय् चुनाव मजूसा मंसिरय् थःपिन्त मान्य मजुइगु धयादिसें असारय् चुनाव मजूसा आन्दोलन यायेगु धयादिल । असारय् चुनाव सुनिश्चित यानाः हे प्रधानन्यायधिसया नेतृत्वय् अन्तरिम चुनावी सरकार दयेकूगु धयादिसें नायः प्रचण्डं सपथ ग्रहण न्ह्यः असारय् चुनाव याकेफइगु अभिब्यक्ति ब्यूपि निर्वाचन आयुक्ततय्गु बोली हिउपाः वःगु खँय् नं आश्चर्य प्वंकादीगु दु ।
