राष्ट्रिय पार्टी जुइत छगू प्रतिशत मत अनिवार्य : निर्वाचन आयोग
निर्वाचन आयोगं राष्ट्रिय पार्टी जुइत समानुपातिक पाखें कुल सदर मतया छगू प्रतिशत मत हयेमाःगु प्रस्ताव याःगु दु । अथे जूसाः कुल सदर मतया छगू प्रतिशत मत हइगु दलया जक संविधानसभाय् प्रतिनिधित्व सुनिश्चित जुइ । अथेहे प्रत्यक्ष पाखें धाःसाः झिगू प्रतिशत मत हयेमफुसा जमानत जफत यायेगु व्यवस्था कायेम याःगु दु । आयोगं राजनीतिक दलहरुसहितया सहलह लिपा निर्वाचन आयोग ऐन, संविधान सभा ऐन, मतदाता नामावली ऐनया संशोधित मस्यौदा सोमवाः राष्ट्रपतिया ज्याकू छ्वःगु दु ।
थुगु न्हूगु प्रस्तावय् सहमति जुल धाःसाः संविधानसभाय् चिधंगु दलतय्गु ल्याः म्हो जुइ । उकिया हुनिं चिधंगु दलतय्सं विरोध याःगु दुसाः तःधंगु पार्टीतय्सं समर्थन याःगु दु ।
निर्वाचन आयोगं थुगु प्रस्ताव हयेमाःगु मू हुनिं समानुपातिक पाखें वंगु दलतय्सं यानाः दलत यक्व विभाजित जूगु व संविधान दयेकेत असर याःगु व दलतय्त बल्लाकेत थुगु प्रस्ताव यानागु खँ धाःगु दु ।
नापं थुगु प्रस्तावित अध्यादेशं यानाः चिधंगु दलत सविधान सभाया निर्वाचनय् ब्वति कायेगु व मकायेगु धाइगु विषयलय् अन्योल जुगू दु ।
उखे नेपाः राष्ट्रिय पार्टीं धाःसाः थःगु पोलिब्युरोया निर्णय कथं चुनावय् वनेगु नापं निर्वाचन आयोगया प्रस्तावया विरोधय् वनेगु आधिकारीक धारणा याकन पितबिइगु धाःगु दु ।
