थनिंनिसें नेवाः दबूया नां नवलपरासी नेवाः देय् दबू

नेवाः दबू नवलपरासीं उगु संस्थाया नां हिउगु दु । न्हापा नेवाः दबू नां तया न्ह्यानाः वयाच्वंगु उगु संस्थां न्हू नां कथं नवलपरासी नेवाः देय् दबू तयेगु धकाः छगू ज्याझ्वःया दथुइ सर्वसम्त पारीत याःगु दु । नापं निक्वःगु जिल्ला सम्मेलन नं क्वचाःगु खः ।

ज्याझ्वःलय् मू पाहाँ कथं झायादीम्ह नेवाः देय् दबूया नायः नरेश ताम्राकारं नेवाःतय्तं छधी छप्पँ यानाः हरेक थासय् नेवाःतय्गु पहिचान सहितया ब्वति व पहुँच दयेकेमाःगु खँय् बः बियादीगु खः ।

नवलपरासी नेवाः देय् दबूया नायः राम चन्द्र श्रेष्ठया नायसुई न्ह्याःगु उगु ज्याझ्वःया उलेज्या मू पाहाँ ताम्राकारं त्वाःदेवाय् मत च्याकाः यानादीगु खः । उगु ज्याझ्वःलय् नवलपरासी देय् दबूया छ्याञ्जे शसीकिरण प्रधानं नवलपरासी नेवाः देय् दबूया प्रगति विवरण न्ह्यःब्वयादीगु खः ।

नापं ज्याझ्वःलय् नेवाः देय् दबूया न्वकु विजय प्रकाश तण्डुकार, दुजः यशोदा श्रेष्ठ, चितवन जिल्ला समितिया नायः उदय पिया, थारु कल्याणकारी समाजया नायः सुकुराम चौधरी, पुन समाजया नायः सुक बहादुर पुनपिंसं नं थःगु नुगः खँ प्वकादीगु खः ।

उगु निक्वःगु सम्मेलन राम चन्द्र श्रेष्ठया नायजुई न्हूगु ज्यासना पुचः ल्ययेगु ज्या नं याःगु खः । न्हूगु ज्यासना पुचःलय् न्वकू चन्द्र बहादुर श्रेष्ठ, छ्याञ्जे रामजी श्रेष्ठ, दांभरि नन्द कुमार श्रेष्ठ, व झिम्ह मूदुजःया ज्यासना पुचः सर्वसम्मतं ल्यःगु खः ।

More Stories Like this