'संघीयता सुनिश्चित यायेत सतक खाली यायेमजिउ'
राजनीतिक विश्लेषकतय्सं पहिचान सहितया संघीयता सुनिश्चिता यायेत संघीय पक्षधरतय्सं सतक खाली यायेमजिउगु बिचाः प्वंकूगु दु । विश्लेषकतय्सं आः न्हूगु संविधानसभाया निंतिं चुनाव जूसां पहिचान सहितया संघीयता सुनिश्चित जुइगु अवस्था मदुगु धासें उकीया निंतिं फुक्क मिले जुयाः दबाव बिइमाःगु खँ धाःगु दु ।
नेवाः स्वायत्त राज्य मंकाः संघर्ष समितिया ग्वसालय् ‘थौंया राजनीतिक अवस्था व पहिचान सहितया संघीयता न्ह्यसः’ विषयक बिचाः गोष्ठी स्वतन्त्र राजनीतिक विश्लेकषतय्सं अज्याःगु बिचाः प्वंकूगु खः ।
मुँज्याय् राजनीतिक विश्लेषक सीके लालं संघीयता धइगु हे पहिचान सहित जुइगु धासें पहिचानया विरोध याइपिं संघीयताया नं विरोधी जूगु धयादिल । वय्कलं संघीयता पक्षधरत छप्पँ मजुइकं झीगु आज्जु ताः मलाइगुलिं मेपिंत ब्वःबिइगु स्वयां झी थः मिले जुइमाःगु धयादिल ।
अथेहे जनजाति अगुवा प्राध्यापक कृष्ण भट्टचनं ब्राम्हणवादी बिचाः दुपिं नेतातय्सं न्ह्याःगु यानाः नं संघीयता मबीगु कुतः कथं संविधानसभाया हत्या याःगु धासें आः हानं संविधानसभाया निर्वाचन जुसां पहिचान सहितया संघीयता वइगु सुनिश्चित मदुगु धयादिल । वय्कलं अज्याःगु संविधान वयेमबीत अनेक षड्यन्त्र जुयाच्वंगु धयादिल ।
संघर्ष समितिया नायः देवेन्द्र श्रेष्ठया सभापतित्वय् न्ह्याःगु मुँज्याय् वरिष्ठ अधिवत्ता पूर्णमान शाक्यं थःपिंसं राष्ट्रपति व प्रधानमन्त्रीयात निर्वाचन याकेत माःगु कानून जक बाधा अडकाउ फुकाव यायेत सुझाव बिउसां समानुपातिया ल्याः म्हो यायेगु थज्याःगु खँ हिइकाः पहिचान सहितया संविधान वये मबीत आवंनिसें हे षड्यन्त्र याःगु द्वपं बियादिल ।
प्रो. माणिकलाल श्रेष्ठं २००७सालया संविधानसभा व जनआन्दोलन लिपाया संविधानसभाया मुद्दा भिन्न परिस्थितिइ वःगु धयादिल । ज्याझ्वलय् संघर्ष समितिया सचिवालय कजि मल्ल के. सुन्दरं लसकुस यानादीगु खः ।
