रेग्मी व कार्टर दथुइ सहलह
मन्त्री परिषदया नायः खिलराज रेग्मी व संयुक्त राष्ट्र संघया पुलांम्ह राष्ट्रपति जिम्मी कार्टर दथुइ शनिवाल् नापलानाः सहलह यानादीगु दु । नायः रेग्मीया निवास बालुवाटारय् जूगु उगु सहलहस निगू पक्षया हित व चिउताःया विषयस सहलह जूगु खः ।
थ्वहे झ्वलय् मू मू राजनीतिक दलतय्गु सहमती संविधानसभाया न्हूगु चुनावया नितिं प्रधानन्यायाधिसया नेतृत्वय् अन्तरिम चुनावी सरकार दयेकूगुयात सकारात्मक कथं कयादिसें क्वःछीगु इलय् हे चुनाव जुइगु नं विश्वास प्वंकादीगु दु । पुलांम्ह राष्ट्रपति कार्टरं संविधानसभाया चुनाव, उकिया नितिं नालेमाःगु उपाय, मतदाता नां मुंकेगु ज्याय् खनेदुगु समस्या, चुनावया विरोध यानाच्वंगु राजनीतिक दलयात सहमती हयेगु विषयस चिउताः प्वंकादीगु खः । वय्कलं दयेकेत्यंगु सत्य निरुपण नापं मेलमिलाप आयोगया विषयस तकं चिउताः प्वंकादीगु सीदुगु दु ।
लिसलय् नायः रेग्मीं चुनाव हे राजनीतिक निकासया उपयुक्त विकल्प जूगु व उगु प्रयोजनया नितिं चुनावी सरकार दयेकूगु धयादिसें सरकारं थःगु ज्या क्वचायेकेगु व नेपाःयात न्हूगु दिशा बीगु धयादिल ।
अथेहे वंगु संविधानसभाया चुनावय् कार्टर सेन्टरं याःगु ग्वाहालियात कयाः च्वछानादिसें नायः रेग्मीं वइगु चुनावय् नं ग्वाहालि यायेत इनाप यानादिल ।
