पिनेदेशय् च्वंपिं नेपाःमितसें वइगु चुनावय् मत बी मखनीगु
ब्वनेगु व लजगाया झ्वलय् पिने देशय् च्वनाच्वंपिं थ्यंमथ्यं स्वीगू लख नेपाःमितसें वइगु संविधानसभाया चुनावय् थःगु भोट कुर्क मदइगु जूगु दु । सम्बन्धित दुतावासपाखें मताधिकारया व्यवस्था यायेत माग यानाच्वंसां नं तत्काल उकथंया व्यवस्था यायेमफइगु जूगु दु ।
निर्वाचन आयोगया आयुक्त डा. अयोधी प्रसाद यादवं पिने देशय् च्वनाच्वंपिं नेपाःमितय्गु मताधिकारया विषयस गम्भिर दुसां नं वइगु चुनावय् उमिगु नितिं मतदानया व्यवस्था यायेत धाःसा प्राविधिक कथं समस्या दुगु धयादीगु दु ।
ब्वनेगु, ज्या यायेगु नापनापं चाःहिउवंपिं नेपाःमित थ्यंमथ्यं स्वीगू लख पिने देशय् दुगु सरकारी तथ्यांक दु । मेखे गैर सरकारी संघसंस्थाया कथं थ्यंमथ्यं न्यय्गू लख नेपाःमित पिने देशय् दु । छगूत्या कोटी मतदाता दुगु देशय् स्वीगू लख नेपाःमितसें मतदान यायेमखनीगु सामान्य खँ धाःसा पक्कां मखु ।
थ्वहे झ्वलय् नेकपा एमालेया भातृ संगठन युवा संघ नेपालं पिने देशय् च्वनाच्वंपिं नेपाःमितय्त तकं मताधिकारया व्यवस्था यायेत माग याःगु दु । विहिवाः निर्वाचन आयोगय् ज्ञापन पौ लःल्हासें युवा संधं वइगु चुनावय् पिनेदेशय् च्वनीपिं नेपाःमितय्गु नितिं सम्बन्धित दुतावासपाखें मत बीगु व्यवस्था यायेत तकं माग याःगु खः ।
अथेहे संविधानसभाया चुनावया नापनापं स्थानीय निकायया चुनाव यायेत, अस्थायी बसोबास यानाच्वंपिन्सं नं समानुपातिकय. मत बीगु व्यवस्था यायेत व किपा दुगु मतदाताया नां धलःयात प्रभावकारी कथं कार्यान्वयन यायेत नं युवा सघं माग याःगु दु ।
