त्रिभुवन विमानस्थलया नितिं जापानपाखें अनुदान
जापानया अन्तराष्ट्रिय सहयोग नियोग जाइकापाखं जापान सरकारं त्रिभुवन अन्तराष्ट्रिय विमानस्थल सुदृढिकरण आयोजना ज्याझ्वः क्वचायेकेत नेपाल सरकारयात ९० गू कोटी ७० गू लख तका अनुदान ग्वाहालि बीत सहमत जूगु दु ।
अर्थ मन्त्रालयस बुधवाः ग्वसाः ग्वःगु छगू ज्याझ्वलय् जापान व नेपाः सरकार दथुइ उगु विमानस्थलया राडर नापं सञ्चार प्रणाली विकास यानाः सुरक्षित हवाइ सेवा उपलब्ध याकेगु नितिं उगु अनुदान ग्वाहालि बीत सहमत जूगु खः ।
उगु अनुदान सहयोगय् धेबा उपलब्ध याकेगु सहमति पतिइ अर्थ मन्त्रालयया सह सचिव मधुकुमार मरासिनी व जाइका नेपालया प्रमुख सुतोमु शिमीजुं ल्हाःचिं तयादीगु खः ।
थ्वहे झ्वलय् अर्थ सचिव शान्तराज सुवेदीं जापान सरकारया अनुदान ग्वाहालिपाखें नेपाःया हवाइ सेवायात अझ सुरक्षित, भलसा कायेबहःगु व सुविधायुक्त दयेकेत महत्वपूर्ण योगदान जुइगु धयादिसें आर्थिक व सामाजिक क्षेत्रय् जापान सरकारं याःगु ग्वाहालियात कयाः आभार प्वंकादिल । अथेहे राजदूत कुनियो ताकाहासीं उगु ग्वाहालिपाखें नेपाःया हवाइ सुरक्षाय् सुधार जुइगु विश्वास प्वंकादिल ।
