परिणाममुखि चुनावया नितिं मंकाः कुतः माःगु

मन्त्रीपरिषदया नायः खिलराज रेग्मीं नेपाःमितय्गु भविष्य क्वःछीगु संविधान दयेकेत संविधानसभाया वइगु चुनावयात परिणाममुखि दयेकेगु नितिं सकसिगु मंकाः कुतः माःगु धयादीगु दु ।
पूर्व राष्ट्र सेवक संगठन राष्ट्रिय समन्वय परिषदं बुधवाः येँय् ग्वसाः ग्वःगु ज्याझ्वलय् न्ववानादिसें नायः रेग्मीं उगु खँ धयादीगु खः । वय्कलं संविधान दयेकेगु ज्यायात देशया प्रमुख ज्या कथं कासें लिपाथ्यंक महत्व तइगु व देशयात स्थीर नापं स्थायीत्व बीगु संविधान दयेकेगु ज्याय् बः बीमाःगु धयादिल ।
नायः रेग्मीं सुख, शान्त व समृद्ध नेपाः दयेकेगु नितिं फुक्क समुदाय, क्षेत्र, वर्गपाखें मदिक्क ग्वाहालि दइगु अपेक्षा यानादिसें आर्थिक उन्नतिया नितिं राजनीतिक स्थायीत्वय् बः बियादिल ।