थ्रीस्टार च्यादँ लिपा लिग च्याम्पियन

शहिद स्मारक ए डिभिजन सुपर लिग फुटबलया उपाधि थ्रीस्टार क्लबं त्याकूगु दु ।

येँया दशरथ रंगशालाय् बुधवाः जूगु न्हापांगु कासाय् निगूगु थासय् लानाच्वंगु मनांग मस्र्यांदी क्लबयात नेपाल पुलिस क्लबं बराबरीइ पनेवं थ्रीस्टार क्लब निगू कासा म्हिते न्ह्यः हे लिग च्याम्पियन जूगु खः ।

यलया थ्रीस्टार क्लब च्यादँ लिपा लिग च्याम्पियन जूगु खःसा थुकिया नापनापं ७५ गू लख तका नं ल्हातय् लाकूगु दु । अथेहे एएफसी प्रेसिडेण्ट कपय् नेपाःया प्रतिनीधित्व याइ । थ्वस्वयां न्ह्यः थ्रीस्टारं २०५४ व २०६१ सालय् ए डिभिजन लिगया उपाधि त्याकूगु खः । प्रदीप हुमागाईं क्लबया नेतृत्व काःगु दँय् हे थ्रीस्टारयात उपाधि त्याकाबिउगु दु ।

थ्वहे झ्वलय् लिग च्याम्पियन जूगु दिनस थ्रीस्टारं मच्छिन्द्र क्लबलिसे बराबरी कासा म्हितल । कासाया ५८ गू मिनेटय् निक्वःखुसी म्हासूगु कार्ड नयाः विक्रम लामा कासाख्यलं पिहांवनेवं १० म्ह कासामी सीमित जूगु थ्रीस्टारं मच्छिन्द्रयात गोलरहित बराबरी पंगु खः ।

अथेहे थौं जूगु न्हापांगु कासाय् मनांगं पुलिसयात दबाबय् तःसां नं गोल यायेमफूगु खः । न्हापांगु हाफय् छुं छुं ह्वःताः त्वःफिकूगु मनांगं निगूगु हाफय् नं गोल यायेमफयेवं कासा बराबरीइ क्वचाःगु खःसा उपाधि थ्रीस्टारयात लःल्हाःगु खः ।

छगू कासा म्हिते ल्यंदनीगु मनांगं निगूगु थासय् च्वनेगु लागि कासा म्हितीसा च्याम्पियन थ्रीस्टारं प्रतिष्ठाया नितिं कासा म्हिती । छगू कासा म्हो म्हितूगु आर्मी व न्यूरोड टिम मनांग स्वयां स्वंगू ल्याखं लिउने लानाच्वंगु दु ।

More Stories Like this