अनिजपाखें पत्रकार महासंघ विरूद्ध आन्दोलन यायेगु ख्याच्वः
आदिवासी जनजाति पत्रकार संघ (अनिज) लगायत थीथी आदिवासी जनजाति व मधेशी पत्रकार संगठनतय्सं नेपाल पत्रकार महासंघ विरूद्ध आन्दोलन यायेगु ख्याच्वः बिउगु दु ।
अनिज लगायत थीथी पत्रकार संगठनतय्सं तत्काल समावेशी आधारय् महासंघया विधान संशोधन मयासाः पत्रकार महासंघ विरुद्ध आन्दोलन यायेगु ख्याच्वः बिउगु खः । थ्वहे वालय् पोखराय् क्वचाःगु केन्द्रीय साधारणसभाया बन्दसत्रय् प्रस्तुत विधान संशोधन प्रस्ताव षडयन्त्रमूलक व अवैधानिक तरीकां लितकाःगु धासें आन्दोलनया ख्याच्वः बिउगु खः ।
अनिजया ग्वसालय् बुधवाः जूगु आदिवासी जनजातितय् मुँज्यां संघर्ष महासंघ विरुद्ध आन्दोलनया निंतिं समिति नीस्वंगु दु । संघर्ष समितिइ अनिज सहित थीथी झिंस्वंगु पत्रकार संघत दुथ्याः ।
अनिजया नेतृत्वय् दइगु उगु संघर्ष समितिक्इ मधेशी पत्रकार संघ, क्रियाशील पत्रकार महिला संघ, मधेशी मिडिया हाउस, जागरण मिडिया सेन्टर, राष्ट्रिय अपाङ पत्रकार संघ, किरात राई पत्रकार संघ, तमु सञ्चारकर्मी संघ नेपाल, आम मगर सञ्चारकर्मी संघ, लिम्बु पत्रकार संघ, एथ्नीक मिडिया फाउन्डेशन, तामाङ सञ्चार समुह, थारु पत्रकार संघ व नेवाः पत्रकार राष्ट्रिय दबूया प्रतिनिधित दुथ्याइ ।
आन्दोलनय् नेपाल पत्रकार महासंघया केन्द्रिय दुजःत दिलिप थामा मगर, प्रकाशचन्द्र परियार, सिद्धराज राई, धर्मेन्द्र कर्ण व राजेश मिश्रं ऐक्यवद्धता प्वंकूगु दु ।
