इशानी श्रेष्ठ जुल मिस नेपाल २०१३
छितः याकः परिवार यःलाकि पुचः परिवार यः अले छाय् ? थ्व न्ह्यसःया लिसः ब्युसें थुगु दँया 'मिस नेपाल २०१३' जुइत मय्जु इशानी श्रेष्ठ ताःलाःगु दु ।
द हिदन ट्रेजरं वंगु १९ दँ न्ह्यःनिसें दँय्दसं ग्वसाःग्वया वयाच्वंगु 'मिस नेपाल'या ज्याझ्वलय् थुगुसी मुक्कं १८ म्हसिनं ब्वति काःगु खः । प्रिजजिङ्गया आधारय् उत्कृष्ट १० म्हेसित ल्यःगु खःसा वयांलिपा जजपिंसं न्यंगु न्ह्यसःया लिसःया आधारय् ५ म्हेसित ल्यःगु खः ।
१७ म्हेसित ल्यूने लाकाः थुगु दँय् 'मिस नेपाल' जुइत ताःलाःम्ह मय्जु इशानी श्रेष्ठयात लिपांम्ह (थगुनेया) 'मिस नेपाल २०१२' मय्जु श्रृष्टी श्रेष्ठं क्राउन पुइकाब्यूगु खः ।
मिस नेपालया उपाधि लिसें वय्कलं न्यय्द्वः दां व थीथी गिफ्ट ह्याम्पर त नं त्याकादीगु दु । थुगु हे दँय् जुइगु मिस वर्ड'य् नं वय्कलं नेपालया प्रतिनिधित्वयासें ब्वति कायेखनीगु खः ।
थुकथं थुगु दँया 'मिस नेपाल अर्थ' मय्जु रोजिशा शाहीं त्याकादीगु दु । वय्कःयात वंगु दया 'मिस नेपाल अर्थ' जुयादीम्ह मय्जु नग्मा श्रेष्ठं क्राउन पुइकादीगु खः । वय्कलं थ्व उपाधिलिसें स्वीन्याद्वः दांलिसें थीथी गिफ्ट ह्याम्पर त्याकादीगु दु । वय्क नं थुगु दँय् जुइगु 'मिस अर्थ'य् ब्वति कायेखनीगु खः ।
थुगु दँया 'मिस नेपाल इन्टरनेशनल'या उपाधी श्रृतिमा शाहं त्याकादीगु दु । वय्कःयात वंगु दँया 'मिस नेपाल इन्टरनेशनल'या उपाधी त्याकादीम्ह मय्जु शुभेच्छा खड्कां क्राउन पुइकादीगु खः । वय्कलं नं नीन्याद्वः दां त्याकूगुलिसें 'मिस इन्टरनेशनल'य ब्वति कायेखनी । अथेहे 'मिस ब्यूटिफुल स्माइल' मय्जु रिचु श्रेष्ठ, 'मिस ट्यालेण्ट' मय्जु सिपोरा गुरुङ्ग, 'मिस पब्लिक च्वाइस' मय्जु अश्मिता सिटौलां त्याकादीगु खः ।
ज्याझ्वलय् न्ववानादिसें 'मिस नेपाल २०१२' त्याकादीम्ह मय्जु श्रृष्टी श्रेष्ठं ब्यूटी प्याजेन्टय् ब्वति कायेखनां थःम्हसिनं यक्व हे खँ सीकागु न्ह्यथनादिसें सकसिगुं ग्वहालि दुगुलिं सकसितं सुभाय् बियादिल ।
थुगुसी 'मिस नेपाल २०१३' य् मालती शाह, मलिना जोशी, बलबहादुर कुँवर, सरोसी शेरचन, सलमान रतिफ, रिमा विश्वकर्मा, चारु मनहोत्रा, राजेन्द्र शलभ, अनुपबहादुर मगर व राजेन्द्र शलभपिं जजकथं च्वनादीगु खः ।
