अमरप्रसाद जोशीया 'अमर-गाथा' विमोचित

च्वमि एवं समावसेवी अमरप्रसाद जोशीं थःगु स्मरणयात कयाः च्वयादीगु 'अमर-गाथा' नांया संक्षिप्त जीवनी व व्यत्वित्व सफू मंगलवाः उलेज्या जूगु दु। बौद्धिक, प्राज्ञिक मेलाय् प्रा. डा.सूर्यलाल अमात्यं जोशीया सफू उलेज्या यानादीगु खः ।

च्वमि ८१ दँ क्यंगु लसताय् न्ह्याकूगु उगु मुँज्याय् मूपाहां कथं पुलाम्ह शिक्षाध्यक्ष प्रा. अमात्यं मनुखं थःगु जीवनय् भोगय् यानातःगु अनुभवया सकतां खँयात लिपिवद्ध यायेमाःगु आवश्यकता दुगु बिचाः प्वंकादिल । नापं वय्कलं च्वमि जोशीया जीवनी गाथापाखें थःम्हं प्रेरणा कयाःगु खँ न्ह्यथनादिसें थुकथंया ज्यां म्हिगः गुकथं देशय् जूगु इतिहास नं सीकेफइगु खँ न्ह्यथनादिल ।

सफू उलेज्याझ्वलय् सफूयात कयाः प्रा. भगवान रत्न तुलाधरं समीक्षा यानादिसें च्वमि जोशी शिक्षा व समाजया ख्यलय् यानादीगु योगदानयात झीसं बांलाक स्वयावन धाःसा यक्व खँत सीकाः कायेफगु खँ न्ह्यथनादिल । नापं वय्कलं आत्मकहानी च्वये वलय् बांलागु खँ जक च्वयेगु मखसें बांमलाःगु पक्षयात नं उला बिइमाःगु खँय् बः बियादिल ।

अथेहे ज्याझ्वलय् प्रा. डा. सुन्दरकृष्ण जोशीं थुलिमछिया वैशय् नं सफू च्वया पितबिइगु धइगु कम महत्वया खँ मखु धासें वय्कःया ज्यां झति प्ररणा बिउगु दु धायादिल । अथेहे प्रा. डा.तेजरत्न कंसाकारं च्वमि जोशीया व्यतित्वयात कयाः चर्चा यानादिल । नापं वय्कलं नेपाल सम्वतयात सरकारं मान्यता बिउसां नं प्रयोगय् मवःगु धासें नेवाः महागुथि नेपालं शंखधर साख्वाःया अध्ययनयात कयाः न्ह्याकूगु ज्यां लिपाया पुस्तापिंत नेपाल सम्वत् व शंखधर साख्वाःया विशेषता छु खः धइगु खँ बांलाकः सीका काय्त तिवः जूवनि धयादिल ।

सभापतिया थासं नेवाः महागुथिया नायः सूर्यलाल प्रजापतिं नेवाःत बल्लाय् माः धकाः धाइ तर थौं नेवाःतय्सं थः मस्तनाप छेंय् अंग्रेजी भाय् ल्हानावयाच्वंगु धासें दुखः प्वंकादिल । वय्कलं लिपा झी पुस्तां झीत हे ल्वमंका वनि धासें अज्याःगु खँय् सचेत जुइमाःगु धयादिल । वय्कलं महागुथिं शंखधर साख्वाःया बारे न्ह्याकूगु अध्ययनया बारे नं चर्चा यानादीगु खः ।

More Stories Like this