राप्रपा नेपालया बसन्तपुरय् आमसभा
राप्रपा नेपालं देय्या प्यंगू दल हे जक नेपाःया राजनीतिक शक्ति व मेमेगु दल ला छुं हे मखु धइ कथंया नीति प्यंगू दलं अवलम्वन याःगु धासें उकिया घोर विरोध याःगु दु । प्यंगू राजनीतिक शक्तित सरकारी निवासय् वनाः दलतय्गु बैठक च्वनाः थःगु मनपरीतन्त्र क्यंगुयात कयाः नं राप्रपा नेपाल आपत्ति प्वंकूगु दु ।
थनया बसन्तपुरय् आइतावाः छगू आमसभा यासें प्यंगू राजनीतिक शक्तिं न्ह्याकाच्वंगु मनपरीतन्त्रया विरोधय् हस्ताक्षर संकलन अभियान शुरु याःगु दु । उगु आमसभाय् राप्रपा नेपालया नायः कमल थापां राष्ट्रपतिया भवन शितल निवासयात तकं प्यंगू राजनीतिक शक्तिया राजनीतिक थलो दय्काः प्यंगू दलं राजनीतिक संयन्त्र दय्कूगुया विरोध स्वरुप वइगु चैत १६ गते उगु राष्टपति भवन घेराउ याःवनेगु घोषणा यानादिल ।
नायः थापां चुनावी सरकारया नायः खिलराज रेग्मीयात नं प्यंगू राजनीतिक शक्तिया निर्णययात जक कार्यान्वयन यायेगुलिइ न्ह्यामच्यूसें देय् व जनताया पक्षय् दनाः थःगु ज्या पुवंकेत इनाप यानादिल । नायः थापां प्यंगू शक्तियात निर्णयापाखें मन्त्रीपरिषद्या विस्तार, राजदूत नियुक्त, संवैधानिक अंगय् नियुक्ति, सर्वोच्च अदालतय् न्यायाधीस नियुक्ति थें जाल्गु ज्या यायेगु अधिकार मदुगुलिं उकथंया ज्या यायेत प्रधानमन्त्री न्ह्याचिला मदीत इनाप यानादिल । थुकथंया अधिकार धइगु जनतां त्याकाः छ्वःपिं पाखें दयेकूगु सरकारं जक याय्दइगुलिं स्वलाया दुने चुनाव क्वचाय्काः जक अज्याःगु ज्या यायेमाःगु खँय् बः बियादिल ।
सभाय् राप्रपा नेपालया नेता केशरवहादुर बिष्टं राप्रपा नेपालया नायः छम्ह जक हे थौंया अवस्थाय् नेपाः प्रधानमन्त्री दय्केत योग्यम्ह व्यतित्व खः धासें प्यंगू दलं याःगु अनेक कथंया भ्रष्टाचार याःगु व देय्यात वरवाद याःगु धयादिल । वय्कलं म्हिगःया पुर्खापिंसं बांलागु देय् त्वःता वंगु धयादिसें प्यंगू दलया राजनीतिक पार्टीं देय्यात बांमलाक स्यंकेगु ज्या याःगुलिं आः थुकिपाखें बचे यायेत राप्रपा नेपाल पार्टीयात जनतां बांलाक म्हसीका विश्वास यायेत इनाप यानादिल ।
