रेडक्रस गणबहाल शाखाया गुक्वःगु दँ मुँज्या
मानवीय भावनां प्रेरित जुयाः न्ह्यज्याइगु संस्था कथं कयातःगु नेपाल रेडक्रस सोसाइटी गणबहाल उपशाखाया गुक्वःगु दँ मुँज्या चैत ३ गते शनिवाः क्वचाःगु दु । उपशाखाया नायः उत्तम नारायण मानन्धरया सभापतित्वय् न्ह्याःगु उगु समारोहस संस्थाया छ्याञ्जे तेजनारायण मानन्धरं वार्षिक प्रगति प्रतिवेदन व निवर्तमान दांभरि पूर्णप्रसाद मानन्धरं वार्षिक ल्याःचाः न्हयब्वयादीगु खः ।
यें जिल्लाया थीथी उपशाखाया सभापतिपिंसं भिंतुना न्वचु बियाः न्ह्याःगु उगु मुँज्याय् रक्त संचार केन्द्रया निर्देशक डा. मर्णिका कर्निकारं मिसा रक्तदातात अप्वयेकेमाःगु खँय् बः बियादिसें रेडक्रसयात थकायेत सहलह ब्याकाः न्ह्याःवनेगु खँ कनादिल ।
थुकथं हे नुगः खँ प्वंकेगु झ्वलय् रेडक्रस यें जिल्लाया मन्त्री मथुराराम श्रेष्ठं रेडक्रसकर्मित कार्यक्षमताया मूल्यांकन यानाः न्ह्यने न्ह्याः वनेफूसा यक्वः तिवः जूवनिगु बिचाः प्वंकादिल । उगु मुँज्याय् संकटा वचत तथा ऋण सहकारी संस्थाया प्रवन्ध निर्देशक विन्देश्वर श्रेष्ठ, रेडक्रस केन्द्रीय कार्यालयया पूर्व कार्यकारी प्रमुख तीर्थराज वन्तपिंसं उपशाखात हे थः गथे याना सक्षम जुइगु खः थ्व पाखे ध्यान बिया ज्या न्ह्याकेमाःगुलिइ बः बियादिल ।
थुकथं हे रेडक्रसया जिल्ला शाखाया संघरत्न शाक्यं रेडक्रसया इतिहास उलादीगु खः । उगु सभाय् सभापतिया थासं अमृत नारायण मानन्धरं मानवीय भावना कथं ज्या न्ह्याकेमाःगु थुगु रेडक्रसया ज्या यायेत सहकार्य यानाः न्ह्याःवनेगु न्ह्यथनादिल ।
