नेवाः देय् दबूया पूर्वाञ्चल स्तरिय सहलह मुँज्या

नेवाः देय् दबूया पूर्वाञ्चल स्तरीय सहलह मुँज्या वंगु शनिवाः क्वचाल । पूर्वाञ्चलया आपालं खलः पुचःया ३००म्ह प्रतिनिधितय् ब्वति दुगु उगु मुँज्याय् केन्द्रीय दुजःतय् नं उपस्थिति दुगु खः । मोरङ्गया उर्लावारी ने.सं.११३३ सिल्लागा त्रयोदशी कुन्हु जूगु उगु मुँज्या पूर्वाञ्चल न्वकु नविन किशोर शाक्या नायसुइ न्ह्याःगु खः । ज्याझ्वलय् नेवाः देय् दबूया नायः नरेश ताम्राकार मूपाहाँ कथं झायादीगु खःसा न्वकुपिं दिपक शाक्य, विजय प्रकाश तण्डुकार, मू छ्याञ्जे रजनी महर्जन, दांभरी विजयरत्न बज्राचार्य नापं केन्द्रीय दुजःपिं प्रकाश खड्गी, पूर्णकृष्ण श्रेष्ठ, यशोदा श्रेष्ठ, सुदर्शन दर्शनधारीं पाहाँ कथं ब्वति कयादीगु खः ।

निगुगु चरणय् न्ह्याःगु उगु ज्याझ्वःया न्हापांगु औपचारिक ज्याझ्वः दबूया छ्याञ्जे माइला बाबु द्योलां न्ह्याकादीगु खःसा केन्द्रीय दुजः प्रकाश खड्गीं लसकुस न्वचु बियादीगु खः । मूपाहाँ नरेश ताम्रकारं त्वादेवाय् मत च्याकाः ज्याझ्वः उलेज्या यानादीगु ज्याझ्वलय् नेवाः देय् दबूया म्हसीका व थीथी विषययात कया मूछ्याञ्जे रजनी महर्जनं थःगु खँ तयादीगु खः ।

अथेहे नेवाः देय् दबूया संगठन व संगठनात्मक गतिविधि विषयस न्वकू विजय प्रकाश तण्डुकारं, भाषा, कला व साहित्यया विषयसं न्वकू दिपक शाक्य व पुर्वाञ्चल भेलाया आवश्यकता व औचित्यया विषयसं दांभरिं विजयरत्न बज्राचार्य थःथःगु विषयवस्तु न्ह्यब्वयादीगु खः ।

ज्याझ्वःया निगुगू चरणय् नेवाः देय् दबूया खुक्वःगु तःमुँज्या, विधान नापं जिल्ला प्रशासन कार्यालय यें लानाच्वंगु उजुरीया विषययात कया सहलह जुल । ज्याझ्वलय् ब्वति काःपिं प्रतिनिधिपिंसं थःथःगु सुझाव विइगु झ्वलय् नेवाः देय् दबूयात राजनीति यायेगु थाय् दयेके मज्यू, गुगुनं राजनीतिक दलय् दुथ्यापिंत नेतृत्व तहलय् हये मज्यू, स्वनिगःया नेवाःतय्सं जक नेतृत्व मयासें स्वनिगः पिने नं ताः ई निसें उत्पीडनय् लानाच्वंपिं नेवाःत, छम्ह खुशी सिथय् च्वनीम्ह नेवाः, छम्ह भीर पाखाय् च्वनीम्ह अले छम्ह बोडर सिथय् च्वनीम्ह नेवाःया नं नेवाः देय् दबू जिइमाःगु व इमिगु समस्या व भावनयात थुइकाः इमित नं नेतृत्व यायेगु मौका विइमाःगु, तःमुँज्याया झ्वलय् स्वनिगः दुनेया नेवाः व स्वनिगः पिनेया नेवाः धकाः गुगु धु्रवीकरण जुल थ्व नेवाःत् निंतिं तःधंगु दुर्भाग्य जूगु धासें अज्याःगु ध्रुवीकरण झी दथुइ गवलें वये मज्यूगु, नेतृत्वया निंतिं कच्वं मयासे नेवाःतय् च्यूताः भाषा, कला, संस्कृति व नेवाः स्वायत्त राज्य कायेगु व राज्यया हरेक तह तप्काय् नेवाःतय् पहुँच सुनिश्चित यायेगु निंतिं जुयेमाःगु बिचाः प्वंकूगु खः ।

अथेहे तःमुँज्या व विधानया विषयसं याकनं हे विवाद ज्यंका न्हू नेतृत्वया निंतिं चुनाव व स्थगित जूगु तःमुँज्याया दिं क्वछिइमाःगु, बहुमतं पारित जुइधंकूगु विधानयात कया विवाद यानाच्वने मज्यूगु, पारित विधान सिडिओपाखें याकनं हे स्वीकृत याका हयेमाःगु खँय् प्रतिनिधितय्सं बः बिउगु खः ।

नापं नेवाः देय् दबूया थुगु कार्य समितिइ आपालं असक्षम दुजपिं दुथ्यानाच्वंगुलिं नं थज्याःगु विवाद पिहांवयाच्वंगु धासें आः वइगु न्हू नेतृत्वय् क्षेत्रिय, लैंगिक आधारय् समानुपातिक, समावेशीय, सहभागिता जुइमाःगु, शैक्षिक योग्यता निसें कया थीथी राष्ट्रिय अन्तराष्ट्रिय विषयवस्तु व आदिवासी जनजातिया हक अधिकारया विषय ज्ञान दुपिंत हयेमाःगु बिचाः नं प्रतिनिधिपिंसं प्वंकूगु खः । अथहे प्रतिनिधिपिंसं थ्व इलय् विवाद ज्यंकेगु निंतिं दबूया संरक्षपिं, सल्लाहकारपिं व पुलांपिं नायःपिंसं पूर्णरुपं जिम्मेवारी कयाः न्ह्यावेने माःगु खँय् बः बिउगु खः ।

More Stories Like this