“विजेश्वरी महाविहार”स पूजा, ध्यान, धर्मदेशना
नेपाःया बौद्ध धर्मकथं म्हसीका दुगु नेपालमण्डलया ऐतिहासिक, पुरातात्विक, सांस्कृतिक महत्वं जागु बाहाः बहीत मध्ये येँ देय्या “विजेश्वरी महाविहार” विजेश्वरी बहीस बही पूजा, नामसंगीति स्तोत्र पाठ, बौद्ध प्रार्थना व गुरुवर डा. नरेशमान बज्राचार्यं तय्का बिज्यागु षडक्षरी मन्त्र ध्यान व धर्मदेशना वंगु फागुन २६ गते शनिवाः सुथय् झःझः धायक न्ह्याःगु दु ।
बौद्ध धर्माबलम्विपिन्सं तसकं हे मन क्वसाय्का न्ह्याःगु उगु ज्याझ्वस आपासिनं ब्वति कयाः पाठ व ध्यान नं याःगु खः । नेपाः छगू ऐतिहासिकतां जाःगु देय् जूगुलिं थुकथंया ज्या न्ह्याका वंसा जक झी नेपाःमि जुयागु गौरव जायाच्वनिगु वाःचाय्का हे थुकथंया ज्या जुया वयाच्वंगु खः । मनूत आध्यात्मिक ज्याय् नं न्ह्याय्माः धैगु आशय् थुगु ज्याझ्वलं क्यनाच्वंगुलिं भक्तजनपिन्सं उत्साह नं क्यनेगु यानाः वयाच्वंगु दु । बाहाः बहीया महत्वयात बांलाक ध्यान मवंकाच्वंगु थौंया अवस्थाय् थुकथंया ज्याझ्वलं बाहाः बहीप्रति थःम्हं नं छुं यानाः वनेमा धैगु भावना जागृत जुइगु आशा काःगु दु ।
थौं पुरातात्विक महत्वं जागु सम्पदायात वास्ता मयाना वंगुलिं उखेला थुखेला मदया वनाच्वंगु नं यक्को थासय् खनेदयाच्वंगु दु ।
