नेवाःतय्गु स्थिति व नेवाः संचारकःमितय्गु भूमिका बारे मुँज्या

देय्न्यंकंया नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबूया ग्वासलय् नेवाःतय्गु स्थिति व नेवाः संचारकःमितय्गु भूमिका विषययात कयाः छगू सहलह ज्याझ्वः जुल।

यलया अक्षयश्वर महाविहारय् "थौंकन्हय् नेवाःतय्गु स्थिति व नेवाः संचारकःमितय्गु भूमिका" विषययात कयाः जूगु ज्याझ्वलय् नेपालभाषा न्हिपौ सन्ध्या टाइम्सया सम्पादक नापं दबूया सल्लाहकार भाजु सुरेश किरण मानन्धरं नेवाः पत्रकारतय्सं आःया अवस्थाय् छगू हे जक मुद्दा संघीयतायात ज्वनाः न्ह्याः वनेमाः धयादिल ।

छापा पत्रकाया विषययात कयाः थःगु नुगःखँ तयेगु झ्वलय् वय्कलं धयादिल, 'नेवाःतय्गु स्थिति व नेवाः पत्रकारतय्गु स्थिति नापनापं स्वाना वनाच्वनीगु अले नेवाःतय्गु स्थिति छु गुगु अवस्थाय् थ्यनी अबलय् नेवाः पत्रकारिताया ख्यः नं व हे अवस्थाय् लानाच्वनी । उकिं नेवाःतय्गु नितिं संघीयता मुल मुद्दा जुयाच्वंगु अवस्थाय् नेवाः पत्रकारतय्सं नं थ्व हे मुद्दायात ज्वना वनेमाः ।'

वय्कलं छापा पत्रकारिता ख्यः लिपांगु इलय् वया तसकं चुनौतिपूर्ण जूगु नापं नेवाः भाय्या छापा पत्रकारिता गुलि विकास जुइमाःगु खः उलि जुया मच्वंगु खँ कुलादिल ।

नेवाः पत्रकार राष्ट्रिय दबू पलिस्था जूगु निदँ क्यंगु नापं विधिवत रुपं येँ जिल्ला प्रशासन ज्याकुथिइ दर्ता जूगु लसताय् ग्वसाः ग्वःगु ज्याझ्वः दबूया केन्द्रीय नायः श्रीकृष्ण महर्जनया सभापतित्वय् जूगु खः ।

ज्याझ्वलय् उज्यालो एफ एमया मन्टेश्वरी राजभण्डारीं नेपालभाषा विकासया नितिं नेपाः थें जाःगु मुलुकय् रेडियो पत्रकारिता तःधंगु अवसर जुइफु धयादिल। रेडियो पत्रकारिताया बिषययात कया: थःगु खँ तयेगु झ्वलय् वय्कलं नेवाः पत्रकारतय्सं न्यनामिया निंतिं जीवन उपयोग जुइगु विषययात जोड बिइमाःगु, व्यावासायीक कथं न्ह्याः वनेमाःगु आधुनिक प्रविधियात नाला वनेमाःगु खँय् बः बियादिल। लिसें वय्कलं नेवाःतय्सं भाय् ल्हायेगु त्वःता हयाच्वंगु इलय् नेवाः भाय् स्यनेगु कथंया रेडियो ज्याझ्वः आवश्यक जूगु खँ कुलादिल ।

अथे हे टेलिभिजन पत्रकारिताया विषयात कयाः थःगु खँ तयेगु झ्वलय् दबूया सल्लाहकार नापं सिने पत्रकार विजयरत्न असंबरें भाषा विकासया निंतिं टेलिभिजन दकलय् तःधंगु माध्यम जुइफु धयादिसें आःया अवस्थाय् टेलिभिजनयात बः बिइमाः धयादिल ।

दबूया छ्याञ्जे लिसें ज्याझ्वःया कजि सुरजवीर बज्राचार्यं लसकुस न्वचु यानादीगु ज्याझ्वलय् सरकारी संचार माध्यमपाखें दबूया सल्लाहकार नापं राष्ट्रिय समाचार समितिया राजु शाक्यं सरकारी संचार माध्यमय् ज्या यानागु अनुभव कनादिल। वय्कलं मेमेगु संचार माध्यमतय्सं जनतायात विश्वास बीमाःगु अवस्था दुगु सरकारी संचार माध्यमय् ज्या यायेबलय् जनतायात स्वयां नं सरकारी अधिकृततय्त लुधंकेमाःगु बाध्यात्मक परिस्थितियात कयाः थःगु बिचाः व अनुभव कनादीगु खः ।

उगु हे ज्याझ्वलय् अनलाइन पत्रकारिताया विषययात कया थःगु नुगःखँ तयेगु झ्वलय् दबूया केन्द्रीय दुजः अस्मित मल्लं छापा पत्रकारिता, रेडियो पत्रकारिता व टेलिभिजन पत्रकारिताया ज्या नं अनलाइनपाखें यायेफुगु खँ कनादिसें आः तक नेवाःतय्सं अनलाईन पत्रकारिता भावनात्मक रुपं जक ज्या याये मालाच्वंगु धासें व्यवसायीकता दुहां वये मफयाच्वंगु खँ कनादिल ।

अथे हे दबूया सल्लाहकार धर्मरत्न शाक्यं नं थःगु नुगःखँ तयादीगु उगु ज्याझ्वलय् नेवाः पत्रकार राष्ट्रिय दबू यल कचाया नायः सुरज ब्यञ्जनकारं सुभाय् न्वचु बियादीगु खःसा दबूया केन्द्रीय दुजः मञ्जु बज्राचार्यं न्ह्याकादीगु खः ।

More Stories Like this