बर्लुस्कोनीयात दच्छि जेलय् कुनेगु फैसला

इटालीया पुलांम्ह प्रधानमन्त्री सिल्भियो बर्लुस्कोनीयात गैरकानूनी फोट ट्यापिंगया द्वपनय् दच्छि जेलय् तयेगु सजाँय न्यंकूगु दु ।

प्रहरीं टेप याःगु बिमा कम्पनीया प्रमुख व पियरो फ्यासिनो दथुइ जूगु खँल्हाबँल्हा थः किजाया पत्रिकाय् पूवंक पिथंगु द्वपं बियातःगु दु । फ्यासिनो बर्लुस्कोनीया राजनीतिक प्रतिद्वन्दि नापं इटालीया दक्कलय् तःधंगु सेन्टर लेफ्ट पार्टीया नेता खः ।

बर्लुस्कोनीं वइगु वालय् मेगू निगू मुद्दाय् सजाँय फयेमालीगु धाःगु दु । ट्याक्स छलेयाःगु व नाबालिग यौनकःमितलिसे शारीरिक स्वापू तयेत धेबा बिउगु द्वपनय् फैसला वइगु अनुमान याःगु दु ।

लिपांगु दँय् बर्लुस्कोनीयात कर छलिया द्वपनय् दच्छिया सजाँय न्यंकूगु खःसा थुकिया बिरुद्ध बर्लुस्कोनीं अपील तकं याःगु खः ।

More Stories Like this