भेनेजुयलाया राष्ट्रपति चाभेज मन्त

भेनेजुयलाया राष्ट्रपति ह्यूगो चाभेज मन्त । क्यूबाय् वासः याकाच्वनादीम्ह ५८ दँया चाभेज स्थानीय ई कथं मंगलवाः न्हिनसिया प्यताःत्या इलय् मदुगु खः । उपराष्ट्रपति निकोलस मडुरों राष्ट्रीय टेलिभिजनपाखें राष्ट्रपति चाभेज सीगु औपचारिक घोषणा यासें वय्कःया अनुपस्थितिइ संवेदना, प्रेम, शान्ति व अनुशासन कायम यानातयेत आह्वान यानादीगु दु ।

चाभेज सीगु घोषणा याःगु इलय् तःक्वःमछि हे ख्वबि हायेकादीम्ह उपराष्ट्रपति मडुरों चाभेजयात गबलें ग्वाहालि मयाःसां नं राष्ट्रिय शोकया इलय् नागरिकया पीडाया सम्मान यायेत विपक्षीतय्त इनाप तकं यानादीगु अन्तराष्ट्रिय सञ्चारमाध्यमं न्ह्यथंगु दु ।

मंगलवाः हे भेनेजुयलाया गृहमन्त्रीं चाभेजयात लिपांगु खुसी सासः ल्हायेगुलिइ तसकं समस्या जूगु धासें छुं घौ लिपा वय्कःया स्थिति तसकं थाकुइफूगु धयादीगु खः ।

राष्ट्रपति चाभेजयात सन् २०११ य् क्यान्सर जूगु पुष्टि जूगु लिपा तःक्वःमछि शल्यक्रिया याःगु खःसां नं लिपांगु शल्यक्रिया लिपा वय्कःया अवस्था झन स्यनावंगु धाःगु खः ।
उसाँय् मदुगु हुनिं न्हूगु कार्यकालया लागि राष्ट्रपतिइ ल्यःसां नं सपथ कायेमखंगु खः । चाभेज १४ दँ न्ह्यःनिसें भेनेजुयलाया राष्ट्रपति जुयाच्वंम्ह खः ।

राष्ट्रपति चाभेज सीवं सरकारं नागरिकया रक्षा व शान्तिया ग्यारेन्टीया लागि धासें देय्न्यंक सैन्य फौज व प्रहरी बल परिचालन याःगु दु ।

थ्वहे दथुइ चाभेज मदयेवं हलिंया यक्व हे नेतातय्सं दुःख प्वंकूगु दु । अथेहे राष्ट्र संघया मूछ्याञ्जे बान कि मुनं चाभेजं सीगुलिं दुःख प्वंकादीगु दु ।

उखे अमेरिकाया राष्ट्रपति बाराक ओबामां ह्यूगो चाभेज मदुगु भेनेजुयलाकया छगू चुनौतिपूर्णं जाःगु ई जूगु धयादिसें अमेरिका भेनेजुयलालिसे न्हूगु स्वापू तयेत इच्छुक जूगु नं धयादिल ।

More Stories Like this