जनजाति महासंघया च्याक्वःगु महाधिवेशन चितवनय्

आदिवासी जनजाति महासंघया च्याक्वःगु महाधिवेशन थ्वहे वइगु वैशाष २८, २९ व ३० गते चितवनय् जुइगु जूगु दु । महासंघया इतिहासय् न्हापांगु खुशी महाधिवेशन स्वनिगः पिने जुइत्यंगु खः । स्वन्हु तक न्ह्याइगु उगु महाधिवेशनं न्हूगु नेतृत्व चयन याइ । महासंघया न्हूगु नेतृत्वया निंतिं आङकाजी शेर्पा, नगेन्द्र कुमाल व चन्द्रविक्रम राईं उम्मेदवारी बिइगु खँ धाःगु दु । अथेहे नेवाःतय्पाखें नेवाः देय् दबूया नायः नरेश ताम्राकारं नं नायः पदया निंतिं उम्मेदवारी बिइगु सम्भावना दुगु खँ धयादीगु दु । महाधिवेशनय् ७१गू जिल्लाया जिल्ला समन्वय परिषद्, ५९गू आदिवासी जनजाति समुदायया प्रतिनिधि, देय् पिने दुगु महासंघया १४गू विदेश शाखा व सम्बन्धन प्राप्त ७गू संगठनया प्रतिनिधितय् ब्वति दइगु खँ धाःगु दु ।