नेवाःतय् प्राचीनता विषयक प्रवचन
बौद्ध अध्ययन केन्द्रीय विभाग त्रि.वि.किपूया ग्वसालय् नेवाःतय् प्राचीनताया बारे छगू प्रवचन ज्याझ्वः जुल । त्रिविया प्रांगनय् आइतवाः जूगु ज्याझ्वलय् प्रा. डा. गौतमबज्र बज्राचार्यं नेवाःतय्गु प्राचीनता बारे प्रवचन बियादीगु खः ।
डा. बज्राचार्यं थःगु प्रवचनया झ्वलय् अफगानिस्तान, भारत आदि देय्या नं खँत न्ह्यःथनादिसें बागमति व विष्णुमतिया लिसें नुवाकोट, तेको, तुदिख्यः तेबाहाः आदि थें जाःगु थीथी खँग्वः नाप नं नेवाःतय्गु प्राचीनता सुलाच्वंगु खँ कनादिल ।
बौद्ध अध्ययन केन्द्रीय विभाग त्रिविया विभागीय प्रमुख मिलन रत्न शाक्यया सभापतित्वय् न्ह्याःगु उगु ज्याझवस डा. बज्राचार्यं भाषा वंशावली, गोपाल वंशावली, विस्केट जात्राः, उपाकु वनेगु, भलभल अष्टमी, सिलु, कुम्मेश्वर मेला, त्रिशुल जात्रा, सरस्वती खुसी, सिथिनखः आदिया पक्षनाप नं नेवाःतय्गु प्राचीनता गाक्कं हे दुसुनाच्वंगु बारे नं संक्षिप्तं व्याख्या यानादीगु खः ।
नेपाःया प्राध्यापकया लिसें बौद्धधर्म अध्ययन यानाच्वंपिं ब्वमिपिनिगु नं आपालं उपस्थिति दुगु उगु ज्याझ्वस विदेशीतय्गु नं सहभागिता दुगु खः । भगवान बुद्धया प्रतिमूर्तिइ दीप प्रज्वलन व खादागा क्वखाय्का न्ह्याःगु प्रवचन ज्याझ्वलय् प्रा. डा. त्रिरत्न मानन्धर, प्रा. डा. हुतराम बैद्य लगायतपिंसं थीथी पक्षयात कयाः न्ह्यसः नं छुनादीगु खःसा उकिया लिसः नं डा. बज्राचार्यं बियादीगु खः । सभापतिया थासं मिलन रत्न शाक्यं थःगु नुगः खँ तयादीगु खः ।
