हनुमानध्वाखाय् पवित्र महापरित्राण
धर्मकर्मया ज्याखँय् नं पलाः न्ह्याकेमाः धैगु खँयात प्राथमिकता बियाः फागुन १९ गते शनिवाःया न्हिस थनया हनुमानध्वाखा प्रांगनय् न्हापांगु ऐतिहासिक वृहत पवित्र महापरित्राण समारोहया उलेज्या मूपाहांया थासं वातावरण, विज्ञान तथा प्रविधि मन्त्री डा. केशवमान शाक्यं बौद्धतय्गु अपार सहभागिताय् उलेज्या यानादीगु दु ।
नेपाःया दिगो शान्तिया नाप नापं मानव कल्याणकारी बुद्धशासनया निरन्तरता, समस्त सत्वप्राणीया सुख, शान्ति, कल्याणया नापं पर्यावरण शान्तिया नितिं गौरवमय भिक्षु महासंघपाखे थुगु महापरित्राण पाठया ज्याझ्वः जूगु खः । उगु ज्याझ्वलय् संघमहानायक भिक्षु अश्वघोष महास्थवीरपाखें पंचशील बियाः बिज्यागु खःसा भिक्षु शोभित पाखें बुद्धपूजाया पाठ यानाः बिज्यागु खः ।
उगु ज्याझ्वःस भिक्षु आनन्दपाखें उगु ज्याझ्वःया उद्धेश्य कना बिज्यागु खः । वय्कलं उद्धेश्य कनेगु झ्वलय् झीसं झीगु धर्म संस्कृतियात इलय् हे संरक्षण यानाः मतल धाःसा कन्हय् थ्व र्हास जुया वनिगु खँया च्यूताः कयाः हे सकल भक्तजनपिंके जागरण वय्मा धकाः हे थुकथंया ग्वसाः ग्वयागु बारे नं कनाबिज्यात ।
श्रीलंका व थाइल्याण्डया राजदूतपिं लगायत आपालं भिक्षु व गुरुमांपिनिगु सहभागिताय् न्ह्याःगु थुगु समारोहस दातापाखें छगू लख दां दान नं याःगु खः । भिक्षु आनन्दया हे निर्देशनय् न्ह्याःगु थुगु ज्याझ्वःया ग्वसाः खलः महादेव मखन क्लब, श्री श्वेत भैरव भजन खलः व महिला बौद्ध समूह खः । महापरित्राण ज्याझ्वःया झ्वलय् बसन्तपुरं बाजं सहितं बुद्धया मुर्ति शोभा यात्रा थःने व क्वने याःगु खः । व्यक्तिगत वा सामाजिकगत रुपय् शान्तिया कामना यानाः महापरित्राण पूजा यानावयाच्वंगु ला यक्को दु तर हनुमानध्वाखाय् जुइगु सामूहिक महापरित्राण सम्भवत इतिहासया हे वृहत शान्तिपुजा जुइगु दावी नं ग्वसाः खलकं याःगु दु । नेपाःया छगू बिस्कंकथंया ज्याझ्वःकथं न्ह्याःगु उगु ज्याझ्वस अष्टपरिष्कार दान नं याःगु दु ।
Related Stories
फागुन १९ स हनुमानध्वाखाय् पवित्र महापरित्राण
