फागुन १९ स हनुमानध्वाखाय् पवित्र महापरित्राण

शारीरिक एवं मानसिकरुपं सुखि जुइया नितिं मनुखं खानपानया लिसें धर्मकर्मया ज्याखँय् नं पलाः न्ह्याकेमाः धैगु खँयात प्राथमिकता बियाः फागुन १९ गते शनिवाःया न्हिस थनया हनुमानध्वाखा प्रांगनय् न्हापांगु ऐतिहासिक वृहत पवित्र महापरित्राण पाठ याइगु जूगु दु । नेपाःया दिगो शान्तिया नाप नापं मानव कल्याणकारी बुद्धशासनया निरन्तरता, समस्त सत्वप्राणीया सुख, शान्ति, कल्याणया नापं पर्यावरण शान्तिया नितिं गौरवमय भिक्षु महासंघपाखे थुुगु महापरित्राण पाठया ज्याझ्वः जुइगु खँ महादेव मखन क्लबया नायो विनोद तुलाधरं धयादीगु दु । भिक्षु आनन्दया निर्देशनय् न्ह्याकेत्यंगु थुगु ज्याझ्वःया ग्वसाः खलः महादेव मखन क्लब, श्री श्वेत भैरव भजन खलः व महिला बौद्ध समूह खः । महापरित्राण ज्याझ्वःया झ्वलय् हनुमानध्वाखां बाजं सहितं बुद्धया र्मूिर्त शोभा यात्रा जुइगु खँ नं धाःगु दु । व्यक्तिगत वा समाजिकगत रुपय् शान्तिया कामना यानाः महापरित्राण पूजा यानावयाच्वंगु ला यक्को दु तर हनुमानध्वाखाय् जुइगु सामूहिक महापरित्राण सम्भवत इतिहासया हे वृहत शान्तिपुजा जुइगु दावी नं ग्वसाः खलकं याःगु दु । नेपाःया छगू बिस्कंकथंया ज्याझ्वःकथं न्हयाइगु थुगु ज्याझ्वलं नेपालय् बुृद्धया शासन गुकथं न्ह्यानाच्वन धकाः नं अनुमान याय्गु अवसर दइगुया नापं बुद्धधर्मप्रति आस्थावानपिन्त थुगु ज्याझ्वः छगू तःधंगु हौसला जूवनिगु नं अनुमान याःगु दु । उगु ज्याझ्वस अष्टपरिष्कार दान नं याय्गु ज्याझ्वः दुगुलिं दान यानाः पुण्य कमय् यानादीत सकल उपासक, उपासिकापिन्त नं ग्वसाः खलकं इनाप याःगु दु ।